*ՌՈՊԵՐԹ ԿԱՐԱՊԵՏԵԱՆ*
26 Հոկտեմբերին Նիւ Եորքի Սրբոց Նահատակաց (ՍՆԱՎ) ամէնօրեայ Ազգային վարժարանի Գալուստեան սրահին մէջ, մեծ շուքով նշուեցաւ Թարգմանչաց տօնը։ Դրօշակներու ներս բերման արարողութենէն ետք հնչեցին ԱՄՆ-ի և ՀՀ օրհներգերը։ Ցերեկոյթը աղօթքով բացաւ Սրբոց Նահատակաց եկեղեցիի հովիւ՝ Արժ. Տ. Աբրահամ Քհնյ. Մալխասեան։ Ներկաներուն բարի գալուստ մաղթեց վարժարանի տնօրէնուհի, վաստակաշատ մանկավարժ Զարմինէ Պօղոսեան։ Օրուան յայտագիրին մասնակցեցան փոքր, միջին եւ բարձր դասարաններու աշակերտները, որոնց կատարմամբ հնչեցին՝ Ավետիք Իսահակեանի, Եղիշէ Չարենցի, Պարոյր Սեւակի, Վահագն Դավթեանի, Խաչիկ Դաշտենցի, Ս. Մուրատեանի եւ ուրիշներու բանաստեղծութիւնները։ Կատարուեցան նաեւ «Թարգմանչաց տօն», «Ոսկէ դար», «Փոքրիկ Հայաստան» եւ հայրենասիրական խմբերգեր։
—Դարեր շարունակ հայ ժողովուրդը գրիչը ձեռքին ստեղծագործելով, մշակոյթ ստեղծելով տուեր է պատասխանը այն չարերուն, որոնք հայ ժողովրդին ցանկացած են ջնջել այս երկրի վրայէն։ Հայ ժողովուրդը արդար, միամիտ, աշխատասէր, պատուաբեր, Հայրենիք ստեղծող, Հայրենիքով ապրող, կռունկեան երգեր երգելով ժողովուրդ է։ Այսօրուան այս երախաներուն բեմէն արտասանած բոլոր բանաստեղծութիւնները պիտի վկայեն, որ այս բոլորը շարունակութիւնն են Մեսրոպ Մաշտոցեան այն զգացմունքներուն, որոնք երկու հազար տարի առաջ Սահակ Պարթեւի հետ միասին տուին հայ ազգին ոսկէ գիրեր, որ մենք գոյատեւենք եւ ստեղծագործենք։ Թող Աստուած օրհնէ մեր այս մատաղ սերունդը, անոնց մանկավարժներուն արեւշատութիւն եւ քաջառողջութիւն տայ։ Յատկապէս կ’ուզէի նշել վարժարանի տնօրէնուհի Զարմինէ Պօղոսեանին, որ իր ջանքն ու եռանդը անմնացորդ ձեւով տուեր է այս մատաղ սերունդի դաստիարակութեան — զրույցի ժամանակ ըսաւ ցերեկոյթի պատուաւոր հիւր, ՀՀ վաստակաւոր արուեստագէտ, ճանչցուած խմբավար Խորէն Մէյխանեճեան։ Օրուան պատուաւոր հիւրերէն էին նաեւ Նիւ Եորքի Համազգայինի անդամներ՝ Սոնեա Պզտիկեան եւ Արմինէ Մինասեան։
