ԵԱՀԿ Մինսքի խումբի համանախագահներ Իկոր Փոփով (Ռուսիա), Փիեռ Անտրիւ (Ֆրանսա) եւ Ճէյմս Ուորլիք (ԱՄՆ), ԵԱՀԿ գործող նախագահի անձնական ներկայացուցիչ դեսպան Անճէյ Քասփչիկի ուղեկցութեամբ, տարածաշրջանային այցի ծիրէն ներս 26 Հոկտեմբերին կը ժամանեն Լեռնային Ղարաբաղի Հանրապետութիւն` հանդիպելու երկրի ղեկավարութեան հետ: Ինչպէս կը տեղեկացնէ ԼՂՀ Արտաքին գործոց նախարարութեան տեղեկատուական վարչութիւնը, 27 Հոկտեմբերին համանախագահները պիտի մասնակցին Մարտակերտ-Թարթառ ճանապարհահատուածի վրայ ԵԱՀԿ առաքելութեան կողմէ իրականացուելիք՝ ԼՂՀ եւ Ազրպէյճանի զինուած ուժերու շփման գիծի դիտարկումին:
Դիտարկման ժամանակ ԵԱՀԿ Մինսքի խումբի համանախագահները եւ ԵԱՀԿ գործող նախագահի անձնական ներկայացուցիչը պիտի անցնին ազրպէյճանական տարածք` Արցախի կողմէ:
ԼՂՀ իշխանութիւնները պատրաստակամութիւն յայտնած են աջակցելու դիտարկման իրականացման եւ ապահովելու դիտարկման մասնակիցներու անվտանգութիւնը։
