Եթէ Հայաստանը ճանչնայ Լեռնային Ղարաբաղի անկախութիւնը, այդ մէկը Ազրպէյճանի մէջ պիտի դիտարկուի իբրեւ սադրիչ քայլ։ Այս մասին Երեւանի մէջ կայացած լրագրողներու հետ հանդիպման ժամանակ, ըսած է ԵԱՀԿ Մինսքի խումբի ամերիկացի համանախագահ Ճէյմս Ուորլիք:
«Հայաստանի կողմէ ԼՂ անկախութեան ճանաչումը Պաքուի մէջ պիտի դիտարկուի իբրեւ սադրիչ քայլ: Իմ յայտարարութիւնը այդ մասին էր, ես չեմ կանխատեսած, որ պատերազմ պիտի սկսի…։ Մենք կը փափաքինք, որ ըլլան այնպիսի բանակցութիւններ, որոնք պիտի առաջնորդեն համընդգրկուն լուծման, բոլոր սկզբունքները պէտք է ընդունուին իբրեւ հիմք», ըստ Artsakhpress.am-ի ըսած է Ուորլիք։
Վերջինս նշած է, որ ժամանակն է, որպէսզի խաղաղութիւն հաստատուի. «Ես անհանգստացած եմ. ժամանակն է, որ խաղաղութիւն ըլլայ: Ատիկա դիւրին չէ, բայց կրնայ աւելի վատ ըլլալ»:
Յիշեցնենք, որ համանախագահները պիտի այցելեն Երեւան եւ Ստեփանակերտ, իսկ 28 Հոկտեմբերին Լեռնային Ղարաբաղի մէջ բարձրաստիճան պաշտօնեաներու հետ հանդիպումներէն յետոյ՝ պիտի հատեն սահմանագիծը եւ պիտի մեկնին Ազրպէյճան:
