Անգարայի հանրապետական գլխաւոր դատախազութիւնը «Ահաբեկչական կազմակերպութեան անդամակցելու» մեղադրանքով հետաքննութիւն սկսած է՝ Հայոց Ցեղասպանութիւնը ճանչցած թուրք յայտնի հրատարակիչ, լրագրող եւ մարդու իրաւունքներու աքթիւիստ Ռակըփ Զարաքոլուի նկատմամբ:
Այս մասին ըստ Armenpress.am-ի, յայտնած է թրքական DemokratHaber լրատուական կայքը նշելով, որ այսպիսի մեղադրանք Զարաքոլուին առաջադրուած է 2010 թուականին՝ քրտական Roj TV հեռուստաալիքին տուած հարցազրոյցին առնչութեամբ: Զարաքոլուի նկատմամբ հետաքննութիւնը Անգարայի դատախազութեան յանձնարարութեամբ սկսած է դատախազ Ռամազան Տինչի կողմէ՝ 2010 թուականին անոր դէմ բացուած «Սահմանադրական կարգի դէմ կատարուած յանցագործութիւններու հետաքննութեան թղթածրար»ի ծիրէն ներս, որմով կ՛ամբաստանուին նաեւ 9 լրագրողներ:
Զարաքոլուի գլխաւորած «Պելկէ» հրատարակչութիւնը հանդէս եկած է թեմայի հետ կապուած յայտարարութեամբ, որուն մէջ նշած է, որ Զարաքոլուն որեւէ հարցազրոյց չէ տուած յիշեալ հեռուստաալիքին, եւ որ անոր դէմ «Ահաբեկչական կազմակերպութեան անդամակցելու» մեղադրանքը շինծու է:
Հրատարակչութիւնը Զարաքոլուի դէմ հետապնդումները բացատրած է այն իրողութեամբ, որ վերջինս մասնակցած է Հայոց Ցեղասպանութեան 100ամեայ տարելիցին առիթով՝ այս տարուան 22-23 Ապրիլին Երեւանի մէջ կազմակերպուած Համաշխարհային գիտաժողովին եւ հանդէս եկած Ցեղասպանութիւնը ժխտողներու դէմ քննադատութեամբ:
«Երեւանի մէջ ունեցած ելոյթէն յետոյ Ռակըփ Զարաքոլուի դէմ «օրակարգ հանուեցաւ դարակին մէջ նիրհող թղթածրարներէն մէկը», նշած է հրատարակչութիւնը: Թրքական կայքը յայտնած է, որ Ռակըփ Զարաքոլուի նկատմամբ նման «մեղադրանք»ը առաջինը չէ:
2011 թուականի Հոկտեմբերին ահաբեկչական կազմկերպութեան օգնելու մեղադրանքով, 5 ամիս ժամկէտով կալանաւորուելէ յետոյ Զարաքոլուն դատարանի որոշման համաձայն ազատ արձակուած էր: Ան կալանաւորուած էր Թուրքիոյ խորհրդարանին մէջ պաշտօնապէս ներկայացուած՝ Քրտական Ժողովուրդներու դեմոկրատական կուսակցութեան (BDP) Քաղաքականութեան ակադեմիայի բացման ժամանակ ելոյթ ունենալու համար:
