«Հայաստանի զարգացման նախաձեռնութիւններ» (IDeA) հիմնադրամի նախաձեռնութեամբ եւ ֆինանսաւորմամբ, ստեղծուած է «Տաթեւ B&B» կայքը, կը հաղորդէ «Մետիամաքս»ը:
Կայքին մէջ մինչեւ Տաթեւի վանական համալիր այցելելը՝ կարելի է նախապէս ծանօթանալ վարձակալութեամբ տրուող հիւրատուներուն եւ մնալու տեղ ապահովել հոն:
Կայքին մէջ զետեղուած են գիշերելու եւ նախաճաշի համար (bed and breakfast) նախատեսուած տուներու եւ հիւրանոցներու տուեալներն ու լուսանկարները, որոնք մանրամասն կը ներկայացնեն մատուցուող ծառայութիւնները:
Կայքին շնորհիւ բացի գիշերելու հարցերը հոգալէ, ամբողջութեամբ կարելի է ծրագրաւորել հանգիստը Տաթեւի եւ շրջակայ տեսարժան վայրերու մէջ:
«Տաթեւ B&B»ի մէջ ներկայացուած են տեսարժան վայրերը, տարբեր ժամանցներ կազմակերպելու հնարաւորութիւններն ու տեղական համեղ սնունդ մատուցող ճաշարանները եւ սրճարանները:
