Այսօր գիշեր ՊԷյրութ կը ժամանէ ԳՈՀԱՐ համոյթի 183 արուեստագէտներէ կազմուած արուեստի հսկայական բանակը, իր նուագախումբով, պարախումբով, երգչախումբով, մեներգողներով, տնօրէնով ու խմբավարով:
ԳՈՀԱՐ Համոյթը անգամ մը եւս կու գայ հայկական երգերով ու երաժշտութեամբ՝ հայրենասիրական ոգի փոխանցելու Լիբանանի երաժշտասէր հանրութեան, ներկայացնելով զուտ եւ իսկական Հայկական արուեստը, պարծանք պարգեւելով իւրաքանչիւր հայորդիի:
Նշենք, որ ԳՈՀԱՐ Սիմֆոնիք Նուագախումբ եւ Երգչախումբը, Լիբանանի երկնակամարին տակ պիտի բաբախէ ամէն ժամանակի իր սիրուած երգերով՝ 29, 30, 31 Հոկտեմբեր եւ 1 Նոյեմբեր 2015ին, Ֆորիւմ տը Պէյրութի (Forum De Beyrouth) մէջ: 100 տարի, 100 երգ եւ իւրաքանչիւր օր տարբեր համերգային ծրագիր։ Տոմսերը կարելի է ապահովել Virgin Ticketing Box Office-էն եւ առցանց (online)։
«Զարթօնք» բարի գալուստ եւ հաճելի կեցութիւն կը մաղթէ ԳՈՀԱՐին, յաջողութիւն եւ յարատեւութիւն ցանկալով խումբին, անոր պատասխանատուներուն ու յատկապէս հովանաւոր Խաչատուրեան եղբայրներուն, անոնց ազգանուէր ու ի նպաստ հայ երաժշտութեան եւ մշակոյթին տարած ազգօգուտ աշխատանքին:
