Արցախի Հանրապետութեան նախագահ Բակօ Սահակեան, 19 Հոկտեմբերին այցելած է Գանձասարի վանական համալիրին կից կառուցուող Մատենադարանի շէնք եւ ծանօթացած տարուած աշխատանքներուն:
ԼՂՀ նախագահի աշխատակազմի տեղեկատուութեան գլխաւոր վարչութեան փոխանցմամբ՝ նախագահ Սահակեան հանդիպում ունեցած է Երեւանի Մեսրոպ Մաշտոցի անուան հին ձեռագիրներու գիտահետազօտական հիմնարկի` Մատենադարանի տնօրէն Հրաչեայ Թամրազեանի եւ հաստատութեան խումբ մը գիտաշխատողներու եւ մասնագէտներու հետ:
Նախագահը գոհունակութեամբ նշած է, որ աշխատանքները արդէն թեւակոխած են վերջնական հանգրուան եւ շուտով աշխատելու պիտի սկսի այս կարեւոր գիտամշակութային կեդրոնը:
Նախագահ Բակօ Սահակեան երախտագիտութիւն յայտնած է Մեսրոպ Մաշտոցի անուան Մատենադարանի տնօրէնին եւ աշխատակիցներուն` մնայուն աջակցութեան համար նշելով, որ առանց անոնց բարձր մասնագիտական եւ հայրենանուէր գործունէութեան, անկարելի պիտի ըլլար յաջողութեամբ իրականացնել Արցախի մէջ Մատենադարանի հիմնադրութեան աշխատանքները:
