Երեքշաբթի, 25. 06. 2024

spot_img

Նիւ Եորք – ԱՄՆ Յիշելով Մեր Անցեալը – Ս. Ներսէս Աստուածաբանական Ճեմարանը Նոր Հանգրուանի Մը Սեմին

                                                                                                          * ՅԱԿՈԲ ՎԱՐԴԻՎԱՌԵԱՆ*

 22 Նոյեմբեր 2015ին պիտի մեծարուին ազգային բարերար Տէր եւ Տիկին Հայկ Տիտիզեանները, իրենց մեծագումար նուիրատուութեան համար՝ Նիւ Եորքի Ս. Ներսէս Աստուածաբանական Ճեմարանի նոր շինարարական կառոյցներուն: Անոնք ծախսերուն մեծ մասը հոգացած եղան եւ որուն պաշտօնական բացումը պիտի կատարուի յառաջիկայ տարի: Առաջնորդ Խաժակ Արք. Պարսամեան այսպիսով իր թեմէն ներս իրագործած կ’ըլլայ նոր շինարարական աշխատանք մը, ապահովելով ճեմարանի գոյութիւնը, եկեղեցական կոչում ունեցող երիտասարդներուն համար:

Անշուշտ դիւրին չեղաւ այս ճեմարանին ծնունդն ու անոր յաջորդող տարիներու երթը: Ան մնալու էր գուրգուրանքին արժանի հաստատութիւն մը, ուրկէ պիտի հասնէին ընդհանրապէս ամերիկածին նոր եկեղեցականներ, որոնք աւելի ուշ վանական կեանքի համար պիտի ղրկուէին Մայր Աթոռ Ս. Էջմիածին, ուր պիտի ստանային ազգային տոհմիկ իրաւ դաստիարակութիւն եւ պիտի լրացնէին իրենց ուսումնական շրջանը: Նշենք, որ այս հաստատութիւնը Ամերիկայի Հայոց թեմի նախկին առաջնորդ Տիրան Արք. Ներսոյեանի տեսիլքն էր եղած:

Քսանամեակ մը առաջ Ճեմարանը կը գտնուէր նիւթական անել կացութեան մէջ: Ան փակուելու վտանգին առաջ կը կանգնէր: Առաջնորդ Խաժակ Սրբազան 28 Յուլիս 1995ին կը դիմէր՝ շիքակոյաբնակ յարգուած ազգայիններ Տոքթ. եւ Տիկ. Ռաֆֆի եւ Շողակ Յովհաննէսեաններուն՝ կազմակերպելու համար նուիրահաւաք ամերիկահայ ազգայիններէն: Դժուար եւ գրեթէ անկարելի իրագործում մըն էր, որ կը վստահուէր Յովհաննէսեաններուն, որովհետեւ մեր բարերարները այդ օրերուն առաւելաբար իրենց նուէրները կը կատարէին երկրաշարժի աղիտեալ գօտիին եւ Հայաստանի Երրորդ Հանրապետութեամբ ծնունդ առած մեր Հայրենիքին բիւր նիւթական կարիքներուն:

Դիւրին պիտի չ’ըլլար անշուշտ Յովհաննէսեաններուն կատարելիք նախաձեռնութիւնը, որովհետեւ անոնք գերմարդկային նուիրումով անկարելին կարելի պիտի դարձնէին՝ ապահովելու համար ճեմարանի գոյութիւնը: Մօտ մէկ միլիոն տոլարի անմիջական անհրաժեշտութիւնը կար՝ բաց պահելու համար Ս. Ներսէս Աստուածաբանական Ճեմարանը: Շնորհիւ ամոլին տարիներու փորձառութեան, ունեցած լայն շրջանակին, յամառ աշխատանքին եւ հմայքին, կարելի եղաւ իրագործել այդ նուիրահաւաքի աշխատանքը երեք ամիսներու կարճ ժամանակամիջոցի մը մէջ: Գտնուեցան եկեղեցասէր ազգայիններ, որոնք ընթացք տուին եղած դիմումներուն: Այդ օրերու Ճեմարանի տեսուչ Առաքել Քհնյ. Ալճալեան մօտէն գործակցեցաւ Յովհաննէսեաններուն հետ, յաջողցնելու այս առաքելութիւնը:

Պէտք է երախտագիտութեամբ արձանագրել նաեւ Փոլ Կարապետեան Չարլզ հիմնադրամի կտակարար՝ փաստաբան Արսէն Հանամիրեանի մասնակցութիւնը այս առթիւ: Ան մօտէն հետեւած ըլլալով Տիկին Շողակ Յովհաննէսեանին տարիներու ազգային անշահախնդիր գործունէութեան, ունեցաւ վստահութիւն եւ կատարեց իր նուիրատուութիւնը: Նոյն տարուան աշնան Գարեգին Ա. Ամենայն Հայոց Հայրապետը կը գտնուէր Ֆլորիտա, ուր ունեցաւ հանդիպում Պրն. Հանամիրեանին հետ: Ան նախապէս 100 հազար տոլար նուիրած էր Ճեմարանին: Հանդիպումէն ետք մեծահոգի ազգայինը յիշեալ հիմնադրամէն 400 հազար տոլար եւս կը նուիրէր Ճեմարանի հիմնադրամին: Այսպիսով մեծագումար կէս միլիոն տոլարի նուիրատուութիւն մը կատարուեցաւ ի նպաստ ճեմարանին, շնորհիւ Տոքթ. եւ Տիկ. Ռաֆֆի Յովհաննէսեաններուն:

Յիշելու համար քսան տարիներ առաջ Ս. Ներսէս Աստուածաբանական Ճեմարանի եղած նուիրատուներէն մաս մը, կ’արձանագրենք անունները անոնցմէ՝ Տիրան Արք. Ներսոյեան Հիմնադրամ՝ 150 հազար տոլար, Տատուրեան ընտանիք՝ 150, Սարգիս Կապրիէլեան՝ 100, Հելէն Մարտիկեան՝ 100, Անուշ Թադեւոսեան՝ 100, Տոքթ. Ռաֆֆի Յովհաննէսեան՝ 50, Հրաչ Թուֆայեան՝ 25, Ասպետ Զաքարեան՝ 25… եւայլն:

Այսօր երբ արդէն գրեթէ պատրաստ է նոր շէնքը այս ճեմարանին, երախտագիտութեամբ կը վերյիշենք այն կարեւոր աշխատանքը, զոր կատարեցին Տոքթ. եւ Տիկ. Ռաֆֆի եւ Շողակ Յովհաննէսեանները: Այդ ալ կարեւոր խթան մը հանդիսացաւ, որպէսզի ճեմարանը կարենայ շարունակել իր առաքելութիւնը գալիք 20 տարիներուն համար:

From L. to R. Mr. and Mrs. Arsen Hanamirian, Arch. Khajag Barsamian, His Holiness Karekin I and Dr. and Mrs. Raffy Hovanessian at St. David's Church in Florida
From L. to R. Mr. and Mrs. Arsen Hanamirian, Arch. Khajag
Barsamian, His Holiness Karekin I and Dr. and Mrs. Raffy Hovanessian at St. David’s Church in Florida
spot_img

ՆՄԱՆ ՆԻՒԹԵՐ

spot_img
spot_img

ՎԵՐՋԻՆ ՅԱՒԵԼՈՒՄՆԵՐ

spot_img

Զօրակցիր Զարթօնք Օրաթերթին