Նիտըրլանտներու (Հոլանտա) Ասեն քաղաքի «Բոտիում Զաուտհախէ» մշակութային կեդրոնին մէջ, Հոկտեմբեր 10-ին տեղի ունեցաւ Հայաստանի եւ Նիտըրլանտներու մէջ բնակող հայ նկարիչներու` Հայոց Ցեղասպանութեան 100-րդ տարելիցին նուիրուած ցուցահանդէսին բացումը: Ցուցահանդէսը, որ կազմակերպուած է Ասենի «Արմենիա» միութեան կողմէ, պիտի գործէ 6 շաբաթ՝ ներկայացնելով հայ նկարիչներ Պետրոս Մարկոսեանի (Ալմելօ), Սամուէլ Յարութիւնեանի (ՀՀ), Մովսէս Պօղոսեանի (ՀՀ), Աննա Ֆատոյի (Ասեն) եւ քանդակագործ Համբարձում Սայադեանի (Ասեն) աւելի քան 80 գործեր: Այս մասին կը յայտնեն ՀՀ ԱԳՆ մամուլի ծառայութենէն։
Ցուցահանդէսի բացման մասնակցներուն իր խօսքը ուղղեց Ասենի փոխքաղաքապետ Ռուտ Վիսեմանը, որ յիշեց Ասենի մէջ Հայոց Ցեղասպանութեան յուշարձանի տեղադրման շուրջ ծաւալած գործընթացները եւ անոր կարեւորութիւնը իբրեւ յանցագործութեան դատապարտման գործին մէջ էական գործօն: Մասնակիցներուն առջեւ ելոյթ ունեցաւ նաեւ «Բոտիում Զաուտհախէ» մշակութային կեդրոնի տնօրէն Գ. Նիւուէլը, որ գոհունակութիւն յայտնեց մշակութային կեդրոնի տանիքի ներքոյ նման ցուցահանդէս հիւրընկալելու հնարաւորութեան համար:
Բացման արարողութեան մասնակիցներուն իր ուղերձը յղեց նաեւ Նիտըրլանտներու մէջ ՀՀ դեսպան Ձիւնիկ Աղաճանեան: Ան կարեւոր համարեց Հայոց Ցեղասպանութեան 100-րդ տարելիցին այսպիսի ցուցահանդէսի մը բացումը, որ կը խորհրդանշէ հայ ժողովուրդի կենսականութիւնն ու արարելու ջիղը, որ իր արտացոլումը գտած է ներկայացուած գծանկարներու գոյներու եւ պատկերներու մէջ: Ան նշեց, որ Ցեղասպանութիւն մտայղացած ոճրագործ միտքի լաւագոյն պատասխանը անկախ Հայաստանի Հանրապետութեան գոյութիւնն է, որ իր բարեկամներու եւ աջակիցներու հետ կը ջանայ հայ ժողովուրդին համար կերտել ապահով, բարգաւաճ ու պայծառ ապագայ:
Ցուցահանդէսի բացման արարողութեան հայ աւանդական տուտուկի կատարումներով հանդէս եկան Նիքոլայ Ռոմաշուքը ու Վահէ Յովհաննիսեանը:
