Կիրակի, 4 Հոկտեմբեր 2015ին Սուրիոյ մէջ Հայաստանի Հանրապետութեան դեսպանութեան կողմէ, Դամասկոսի «Շամ» Պանթոկին մէջ տեղի ունեցաւ պաշտօնական ընդունելութիւն` նուիրուած Հայաստանի Հանրապետութեան անկախութեան 24րդ տարեդարձին: Այս մասին կը յայտնէ «Բերիոյ նիւզ»ը:
Ընդունելութեան ներկայ եղան Սուրիոյ խորհրդարանի նախագահ Մուհամմատ Ճիհատ ալ-Լահհամ, նախարարներ՝ ներառեալ բնապահպանութեան հարցերով պետական նախարար Նազիրա Սարգիս, ինչպէս նաեւ խորհրդարանի անդամներ, դեսպաններ, քաղաքական կուսակցութիւններու, հասարակական կազմակերպութիւններու եւ հայկական բոլոր կառոյցներու ղեկավարներ, հոգեւոր առաջնորդներ, հասարակական կազմակերպութիւններու եւ լրատուամիջոցներու ներկայացուցիչներ:
Ներկաներուն բարի գալուստ մաղթեց Սուրիոյ մէջ Հայաստանի դեսպան փրոֆ. դոկտ. Արշակ Փոլատեան: Ան հանգամանօրէն անդրադարձաւ Հայաստանի 24 ամեայ ուղիին` արժեւորելով Հայաստանի ներքին եւ արտաքին քաղաքականութիւնը: Դեսպան Փոլատեան բարձր գնահատեց հայ-սուրիական երկկողմ բարեկամական յարաբերութիւններու ներկայ մակարդակը:
Ապա Սուրիացի մտաւորական Նեպիլ Թաամէ, ՀՀ Նախագահին որոշումով դեսպան Փոլատեանի ձեռամբ պարգեւատրուեցաւ:
