Հալէպի մէջ իրավիճակը բաւական հանգիստ է եւ կայուն: Այս մասին «Արմէնփրես»ին տեղեկացուցած է Հալէպի իր աղբիւրը` աւելցնելով, որ մերթ ընդ մերթ ռումբեր կ՛իյնան, սակայն նախկին հրթիռակոծութեան բուռն տարափը նուազած է:
«Կենցաղային դժուարութիւնները կը շարունակուին, ելեկտրական հոսանքը օրուան ընթացքին 1-2 ժամ կու գայ, իսկ ջուրը ընդհատումներով կը մատակարարուի», նշած է աղբիւրը աւելցնելով, որ կենցաղային դժաուարութիւնները առօրեայի մաս կը կազմեն:
Հալէպ քաղաքը 2012ի ամառէն ի վեր յայտնուած է կառավարական ուժերու եւ զինեալ տասնեակ խմբաւորումներու բախումներու թիրախ, որ մինչեւ այսօր կը շարունակուին: Քաղաքի արեւմտեան թաղամասերը կը գտնուին կառավարական ուժերու, իսկ արեւելեանները զինեալ խմբաւորումներու հսկողութեան տակ:
