Սեպտեմբեր 29-ին կայացած քաղաքային խորհուրդի նիստին, Սպանիոյ Վալենսիա մարզի մէջ գտնուող Սիյա (Silla) քաղաքը պաշտօնապէս ճանչցաւ Հայոց Ցեղասպանութիւնը: “Արարատ” հայկական միութեան մշակած բանաձեւը ներկայացուց Ձախ Միութեան (Izquierda Unida) խօսնակ Վալենթին Մաթէոն (Valentin Mateo), որ իր խօսքին մէջ հակիրճ ներկայացուց 20-րդ դարու առաջին Ցեղասպանութեան պատճառներն ու հետեւանքները, զայն պաշտօնապէս ճանչնալու անհրաժեշտութիւնը: Այս մասին “Հայերն Այսօր”ին կը յայտնեն “Արարատ” հայկական միութենէն:
Քաղաքային խորհուրդը ներկայացնող 6 կուսակցութիւնները (Սոցիալիստական, Ժողովրդական, Սիուդադանոս, Կոմպրոմիս, Ձախ Միութիւն եւ Իսպանիա-2000) միաձայն կողմ քուէարկեցին՝ Օսմանեան Թուրքիոյ կողմէ իրականացուած ոճրագործութիւնը իբրեւ ցեղասպանութիւն որակած բանաձեւին:
Այսպիսով Սիյէան դարձաւ Սպանիոյ 10-րդ քաղաքը, որ պաշտօնապէս ճանչցաւ Հայոց Ցեղասպանութիւնը:
Նիստին ներկայ էին “Արարատ” հայկական միութեան անդամներ Նելլի Աբովեան, Կայէն Մարտիրոսեան, Եսթեր Յակոբեան, Արամ Ղուկասեան եւ այլք: Շնորհակալական խօսքով հանդէս եկաւ Նելլի Աբովեան, որ նշեց, թէ կարեւոր է այն հանգամանքը, որ այսպիսի կարեւոր հարցերու պարագային, կուսակցական գոյները կը միաւորուին: Ի նշան երախտագիտութեան` ան Վալենթին Մաթէոյին նուիրեց անմոռուկի կրծքանշանը:
Շնորհակալական խօսքով հանդէս եկաւ նաեւ Միսլատայի Ձախ Միութեան նախկին խորհրդական, հայ ժողովրդի բարեկամ Սալվատոր Կարսիան (Salvador Garcia), որ կարեւոր նկատեց հայ համայնքին դերը Սպանիոյ մէջ, յորդորելով Վալենսիոյ եւ Սպանիոյ կառավարութիւններուն՝ հետեւելու թագաւորութեան 10 քաղաքներու եւ 4 մարզերու օրինակին, որոնք պաշտօնապէս ճանչցած են Հայոց Ցեղասպանութիւնը: Ան աւելցուց, թէ պիտի պայքարին՝ մինչեւ որ բոլոր պետական կառոյցները հետեւին իրենց քայլին:
