Ամերիկեան գոնկրէսականները կ՛ահազանգեն` Միջին Արեւելքի մէջ հայերու եւ հայկական յուշարձաններու դէմ յարձակումներու առնչութեամբ: Ելոյթ ունենալով Ուաշինկթըն գտնուող Հայաստանի նախագահ Սերժ Սարգսեանի մասնակցութեամբ, Ռաուլ Ուոլենպըրկի անուան միջազգային հիմնադրամի կողմէ՝ ի պատիւ ՀՀ նախագահին կազմակերպուած ընդունելութեան պատուաւոր ձեռնարկին, հայկական արմատներ ունեցող գոնկրէսական Ճեքի Սփիրը ընդգծած է խնդիրի կարեւորութիւնը:
«Իսլամական պետութիւն» խմբաւորումը պատմական այլ յուշարձաններու շարքին կ՛ոչնչացնէ նաեւ Հայոց Ցեղասպանութեան յիշատակին նուիրուած յուշարձանները», ըսած է Սփիրը, կը հաղորդէ PanARMENIAN.Net -ը՝ վկայակոչելով «Ամերիկայի Ձայն»ը:
ԱՄՆ Ներկայացուցիչներու պալատի Արտաքին յարաբերութիւններու յանձնաժողովի ղեկավար գոնկրէսական էտ Ռոյս իր հերթին աւելցուցած է, որ վտանգուած են Սուրիոյ մէջ բնակող հազարաւոր հայերու կեանքեր:
«Մենք բոլորս տեղեակ ենք, որ հայ քրիստոնեաներու դէմ ծայրայեղական խումբերու կողմէ թիրախաւորուած յարձակումներ կը կատարեն թէ՛Ալ Նուսրան եւ թէ՛ «Իսլամական պետութիւն» խմբաւորումը: Այնտեղ հայերու դէմ մեր աչքին առաջ ահաւոր բռնութիւններ կը կատարուին, նաեւ նոյն հայերու աղօթատեղիներուն դէմ Քեսապի, Տէր Զօրի, եւ Հալէպի մէջ», ըսած է գոկրեսականը:
