Սեպտեմբեր 27-ին Հայաստանը իբրեւ պատուաւոր հիւր մասնակցեցաւ, Զուիցերիոյ Ֆեշի քաղաքին մէջ 1996 թուականէն ի վեր կազմակերպուող՝ «Աշխարհի գինիներ» խորագիրով ամէնամեայ փառատօնին։ Այս մասին կը յայտնեն Հայաստանի Արտաքին դործոց նախարարութեան (ԱԳՆ) մամուլի ծառայութենէն:
Հայաստանի Գիւղատնտեսութեան նախարարութեան աջակցութեամբ` Հայաստանէն Զուիցերիա տարուած հայկական խաղողի չորս տեսակներու որթատունկերը, հանդիսաւոր արարողութեամբ տնկուեցան Ֆեշիի 11-րդ դարու եկեղեցւոյ մօտ գտնուող` «Աշխարհի գինիներ» անունը կրող տնկիներու այգին մէջ Ֆրանսայի, Իտալիոյ, Արժանթինի, Սպանիոյ եւ այլ երկիրներու տնկիներու կողքին:
Պաշտօնական արարողութեան բացման խօսքով հանդէս եկան Ֆեշիի համայնքային խորհուրդի ղեկավարը, փառատօնի նախագահը եւ ՀՀ դեսպանութեան ներկայացուցիչ Յասմիկ Տոլմաճեանը:
«Խորհրդանշական է, որ ինչպէս Աստուածաշնչեան աւանդութեան, ըստ որու Նոյ նահապետը Արարատի ստորոտը` Հայաստանի մէջ տնկեց խաղողի առաջին որթատունկը, այդպէս ալ հնագիտական ուսումնասիրութիւններու համաձայն` խաղողագործութեան եւ գինեգործութեան վեցհազարամեայ բնօրրան համարուող Հայաստանէն բերուած որթատունկերը, կրկին կը հանգրուանին Զուիցերիոյ հիւրընկալ հողին մէջ գտնուող խաղաղութիւն, համերաշխութիւն եւ բազմազանութիւն խորհրդանշող այս այգին», իր խօսքին մէջ նշեց Յասմիկ Տոլմաճեան:
Ֆեշիցիներուն եւ Զուիցերիոյ տարբեր վայրերէն ժամանած փառատօնի հիւրերուն, հայ երգարուեստն ու պարարուեստը ներկայացուցին զուիցերահայ համայնքի «Արաքս» երգչախումբն ու «Սանահին» պարախումբը:
Փառատօնի ընթացքին կազմակերպուեցաւ Հայաստանի Գիւղատնտեսութեան նախարարութեան կողմէ տրամադրուած՝ հայկական տասնեակ մը լաւագոյն գինիներու ցուցադրութիւն եւ համտեսում, նաեւ մատուցուեցան հայկական ուտեստներ:
