Քրիսթաֆըր Չէյմպըրզ, որուն բեմադրած «Արամ, Արամ» ֆիլմը ցուցադրուեցաւ այս տարուան Հայաստանի «Ոսկէ Ծիրան» շարժապատկերի փառատօնին, կը յայտնէ, թէ ֆիլմը պատմութիւնն է 12 տարեկան Արամին, որ Պէյրութէն գաղթելով կը հաստատուի՝ Լոս Անճելըսի Փոքրիկ Հայաստան շրջանը ապրող իր մեծ հօր մօտ, դիմագրաւելով նոր միջավայրին ընտելանալու դժուարութիւնները:
Փոքրիկն Արամին դերը խաղցած է Ճան Ռուհինեան։ Ֆիլմին մէջ Արամ կը փորձէ համակերպիլ կեանքի նոր պայմաններուն՝ տառապելով աւանդական արժէքներու եւ իրեն համար անծանօթ մշակոյթի մը կողմէ պարտադրուող օրէնքներուն միջեւ: Փոքրիկ Հայաստանի մէջ ան կը գտնուի տարբեր խմբաւորումներու բախման կեդրոնը:
Արամի մեծ հօր դերը ստանձնած է Լեւոն Շարաֆեան: Դերասաններու շարքին են նաեւ Սեւակ Հաքոյեան, Ալլա Թումանեան, Ինգա Ստամբոլցեան եւ այլք:
Չէյմպըրզ կը յայտնէ, թէ իր ամբողջ կենաքը Լոս Անճելըս ապրած է, սակայն միայն վերջերս ծանօթացած է հայերուն եւ նկատած, թէ ցարդ Փոքրիկ Հայաստանի մէջ զգալի ներկայութիւն ունեցող հայերուն մասին ֆիլմ մը չէ արտադրուած: Ան այս շարժապատկերին նախնական պատրաստութիւններուն սկսած է 2010ին՝ ընդունելով, որ անկէ առաջ ծանօթ եղած է հայերուն մասին միայն որոշ կարծրատիպերու։
Պատմութեան նախնական օրինակը պատրաստելէ ետք Չէյմպըրզ խորհրդակցած է շարք մը հայերու հետ, ֆիլմին վաւերականութիւնը պահպանելու նպատակով։
«Ինծի համար հետաքրքրական էր հայ համայնքին մօտէն ծանօթանալը՝ նկատի ունենալով, որ ան սովորաբար կ՛ապրի մեկուսացած պայմաններու մէջ, որ կարծրատիպերու յառաջացման եւ սխալ հասկացողութեան կ՛առաջնորդէ», կ՛ըսէ Չէյմպըրզ, որ ֆիլմի պատրաստութեան ընթացքին զրոյցներ ունեցած է նաեւ Փոքրիկ Հայաստան բնակող հայերու հետ՝ ծանօթանալով անոնց պատմութիւններուն եւ տեղեկանալով անոնց մշակութային առանձնայատկութիւններուն:
«Յոյս ունիմ, որ այս պարզ պատմութիւնը առիթ կու տայ քննարկումներու, որոնց միջոցով օտարները աւելի մօտէն կը ծանօթանան հայկական մշակոյթին», կը նշէ ան:
10-18 Յունիսին Լոս Անճելըսի շարժապատկերի փառատօնին ցուցադրուելէ ետք, ֆիլմը 6-7 Սեպտեմբերին Մոնթրէալի մէջ կայացած շարժապատկերի փառատօնին եւս ցուցադրուեցաւ։
Աշխատանք կը տարուի ֆիլմը Հոկտեմբերին ցուցադրելու Ֆրեզնոյի, Կլենտէյլի, Լոս Անճելըսի, Էնսինոյի, Պոսթընի եւ Նիւ Եորքի մէջ։
(Ըստ ԱՄՆ–ի մեր պաշտօնակից «Ասպարէզ» օրաթերթին՝որմէ առինք այս լուրը, նիւթը քաղուած է Ալին Գրիգորեանի թղթակցութենէն եւ ֆիլմի համացանցային կայքէն)
