30 Սեպտեմբերին Ուքրանիոյ Տնեպրոփեթրովսկի քաղաքային խորհուրդը իր 67րդ գումարման նստաշրջանին, դատապարտած է Հայոց Ցեղասպանութիւնը եւ հանդէս եկած է համապատասխան յայտարարութեամբ: Այս մասին կը գրէ Genocide.org.ua կայքէջը` յղում կատարելով litsa.com.ua-ին:
Պատգամաւորներու կարծիքով Ուքրանիոյ համար, որ աշխարհին ցոյց տուած է ազատութեան եւ ընկերվարութեան իտէալներուն հաւատարիմ ըլլալը, կարեւոր է ճանչնալ Հայոց Ցեղասպանութիւնը, քանի որ ուքրանիացիները նմանատիպ յանցագործութեան զոհ դարձած են ստալինեան ռեժիմի ժամանակ:
«Հաստատելով մեր հաւատարմութիւնը` ցեղասպանութիւններու կանխարգիլման միջազգային պայքարի մէջ, ցեղասպանութեան ենթարկուած ազգերու իրաւունքներու վերականգնման գործի մէջ եւ հաստատելով պատմական ճշմարտութիւնը` մենք կը դատապարտենք Հայոց Ցեղասպանութիւնը եւ կոչ կ’ընենք Ուքրանիոյ նախագահին, Գլխաւոր Ռատային (խորհրդարան), արտայայտելու իրենց համերաշխութիւնը միջազգային հասարակութեան եւ ճանչնալու Օսմանեան կայսրութեան մէջ իրականացած Հայոց Ցեղասպանութիւնը», ըսուած է յայտարարութեան մէջ:
