Հայաստանի պաշտպանութեան նախարարութեան Բաղրամեան զօրավարժարանին մէջ սկսաւ՝ Հաւաքական Անվտանգութեան Պայմանագրի Կազմակերպութեան (ՀԱՊԿ) «Անխախտելի եղբայրութիւն 2015» զինավարժութիւնը, որ պիտի շարունակուի մինչեւ 4 Հոկտեմբեր: Այս առումով Հայաստանի զինուած ուժերու սպայակոյտի պետ զօրավար Եուրի Խաչատուրով յայտարարեց, որ այս հանգրուանին ղարաբաղեան հակամարտութեան գօտիին մէջ խաղաղապահ ուժեր տեղակայելու անհրաժեշտութիւն չկայ: «Մենք կարողութիւն ունինք զսպելու սադրանքները: Մենք համարժէք պատասխան տուած ենք հակառակորդի խախտումներուն: Անոնք լուրջ կորուստներ ունեցած են», հաստատեց Խաչատուրով: Զօրավարը սակայն նշեց, որ ՀԱՊԿի երկիրներուն կողմէ մեկնաբանութեան հրապարակումը պիտի ըլլար ցանկալի: «Աւելի լաւ է խաղաղապահութեամբ զբաղիլ, քան պատերազմով», ըսաւ զօրավարը:
