Երեքշաբթի, 21. 05. 2024

spot_img

Լիբանան – Գիտութեան Առաջին Զանգը Հնչեց Վահան Թէքէեան Վարժարանէն Ներս

Նոր աշխարհաքաղաքական զարգացումներուն ընդառաջ, հայ դպրոցը ի դէմս բազմաթիւ դժուարութիւններու կը փորձէ միշտ մնալ միջնաբերդը հայ լեզուի գոյատեւման ու հայապահպանման, ինչպէս նաեւ պահանջատէրը Հայ Դատի ու կերտիչը հայ ընկերասիրութեան:

Գիտութեան առաջին զանգը հնչեց «լուսոյ տաճար» Լիբանանի Վահան Թէքէեան միջնակարգ Վարժարանին մէջ , Երկուշաբթի 28 Սեպտեմբեր 2015, առաւօտեան ժամը 7:30ին, ուր իր յարկին տակ համախմբելով վաղեմի եւ նորեկ աշակերտները ազդարարուեցաւ գիտութեան նոր տարեշրջանի մը սկիզբը:

Հայ աշակերտին երկրորդ տունը՝ Վահան Թէքէեան միջնակարգ վարժարանը, միշտ եղած է ու կը մնայ հայ կրթութեան, լուսաշող ապագայի ու դէպի ազատական գաղափարի կերտման դարբնոցը: Հոն հայ աշակերտը ո՛չ միայն մայրենին կը սորվի, այլ գիտութիւն ամբարելու կողքին նաեւ կը ծանօթանայ մեր լեզուին ու զայն ստեղծող ժողովուրդի գաղտնիքներուն, մշակոյթին՝ դարաւոր պատմութեան ծալքերուն հետ միատեղ, ու անկասկած նաեւ կը ներշնչուի անոնցմով ու վերջապէս կը ջերմացնէ եւ կը պահէ իր հայու հոգին:

Լիբանանի, Հայաստանի եւ դպրոցին օրհներգները ունկնդրելէ ետք բեմ բարձրացաւ վարժարանիս ժրաջան տնօրէնուհի Տիկ.  Կալինա  Նաճարեան, որ բարի եւ ուրախ վերամուտ  մաղթելէ ետք  աւելցուց, թէ կրթական  այս  տարեշրջանը  պիտի  ըլլայ  վարժարանին համար  նոր գիտելիքներ ամբարելու, այլոց հետ մրցելու, կարողութիւններ ու տաղանդներ յայտնաբերելու եւ նոր նուաճումներ արձանագրելու տարեշրջան մը: Ապա խօսքը  շարունակելով ան ըսաւ, թէ  այս կրթական տարեշրջանը պիտի ըլլայ նոր հանգրուան մը նաեւ՝ նայելու եւ ծրագրելու աշխատանքները Հայոց Ցեղասպանութեան 100ամեակէն անդին: Հետեւաբար ան կոչ ուղղեց աշակերտութեան, որ ազգային-պահանջատիրական ոգիով շարունակեն անաղարտ պահպանել մայրենին, որ ինքնութեան հիմնական գրաւականն է ու երաշխիքը, նաեւ աննահանջ մասնակցութիւն բերեն մեր պահանջատիրական երթին, ձեռք բերելու համար հայ ժողովուրդի իրաւունքները, ինչպէս  նաեւ  բարձր  պահեն հայուն  եւ  հայ  ազգին  պատիւն  ու  արժանապատուութիւնը:

Յարգելի Տնօրէնուհին յետադարձ ակնարկ մը նետելով անցնող չորս տարիներուն ըսաւ, թէ նիւթական դժուարութիւնները երբեք պատրուակ չեղան՝ ապահովելու նոր նուաճումներ վարժարանին համար: Հետեւաբար իր եւ աշակերտութեան անունով յատուկ շնորհակալութիւն յայտնեց բոլոր անհատ բարերարներուն, անձնուիրութեամբ գործող ազգայիններուն, ինչպէս նաեւ ԹՄՄ Հիմնադիրներու մարմինին, հոգաբարձութեան, ուսուցչակազմին եւ ծնողաց յանձնախումբի ժրաջան տիկիններուն, որոնք աչքի լոյսի պէս կը պահպանեն վարժարանին գոյատեւումն ու բարձր վերելքը:

Տնօրէնուհիին  խօսքէն  ետք  տեղի  ունեցաւ  գեղարուեստական  կոկիկ  յայտագիր,  համադրութեամբ վարժարանիս  երաժշտութեան  ուսուցիչ Պրն. Երուանդ  Քէշիշեանին, որուն ընթացքին ելոյթ  ունեցաւ  աշակերուհի Վարդի Սաշխանեան  (միջն Ա.), արտասանելով Հրաչեայ Օհանեանի «Դէպի Դպրոց» բանաստեղծութիւնը: Ալին Գէորգեան (նախ. Բ.)  մեներգեց  Ս. Սարուխանեանի «Հարազատ Դպրոց» երգը, որմէ ետք Էլիաս Ռահպանիի «Ազէֆ Ալլէյլ» արաբական երաժշտական կատարումով ելոյթ ունեցան՝ վարժարանիս  երաժշտութեան  ուսուցիչ Պրն.  Երուանդ  Քէշիշեան դաշնամուրի ընկերակցութեամբ, Փիթըր Մուրատեան (միջն. Բ) տհոլի վրայ, ապա  Ռիթա Մարտիրոսեան (նախ. Դ.) ասմունքեց  Ռ. Ղարիպեանի «Դպրոցական  Զանգը»: Յաջորդաբար երաժշտական կատարումներով հանդես եկան Կրէյս Ուլիկեան (միջն. Բ.) կիթառի վրայ, իսկ Դալար Գէորգեան (միջն. Բ.) դաշնամուրի վրայ, որոնք նուագեցին հատուածներ դասական երաժշտութենէ: Հուսկ հանդէս եկան Քրիստին եւ Գարլօ Սապունճեաններ (միջն Ա. եւ Գ), որոնք կատարեցին Դ. Ղազարեանի «Հնչում է զանգը» զուգերգը:

Յայտագիրի  աւարտին աշակերտները խրոխտ եւ ուրախ քայլերով իրենց  ուսուցիչներուն  առաջնորդութեամբ ուղղուեցան դասարանները, եւ  Վահան  Թէքէեանի  շունչով  ու  ոգիով  թրծուած սկսան  նոր  տարեշրջանը:

Իսկ Վարժարանիս մանկապարտէզի վերամուտը սկսաւ բաւական խանդավառ եւ գունազարդ: Ան գուրգուրոտ մօր մը նման լայն բացած իր դռները՝ բարի վերամուտ կը մաղթէր իր հին և նորեկ աշակերտներուն, առաջնորդելով զանոնք փակը, որուն շուրջի պատերը գունազարդ գծագրութիւններով զարդարուած էին։

Բացման խօսքով մանկապարտիզպանուհի Տիկ. Վերա Հաննա բարի գալուստ մաղթելէ ետք ըսաւ, թէ մանկութիւնը կեանքի ամէնէն կարեւոր հանգրուանն է ու այս տարի եւս ջանք պիտի չխնայեն, որ իրենց վստահուած մանուկներուն փոխանցեն սէր ու գուրգուրանք, նաեւ հայեցի ու ազգային դաստիարակութիւն։ Ապա յատուկ շնորհակալութիւն յայտնեց ծնողներուն՝ իրենց ունեցած վստահութեան վարժարանին հանդէպ, որ այս տարեշրջանին պիտի տօնէ իր 65 ամեակը։

Գեղարուեստական կոկիկ յայտագիրի ընդմէջէն փոքրիկները խմբերգեցին Լիբանանի, Հայաստանի ու Վարժարանի քայլերգները, որմէ ետք անոնց բաժնուեցաւ բարի վերամուտի առթիւ պատրաստուած յատուկ ձեռայիններ, ինչպէս նաեւ կազմակերպուեցան խաղեր իւրաքանչիւր դասարանի յարմար:

Փոքրիկներուն ուրախութիւնը հասաւ իր գագաթնակէտին, երբ անակնկալօրէն ժամանեց «Արջուկ»ը, որուն հետ միասին պարեցին և մարմնամարզանքներ կատարեցին։ Ապա միասնաբար բարձրացան սրահ, ուր բաժնուեցան վերամուտի յարմար նուէրներ և տեղի ունեցաւ նկարահանում։

Վերջապէս աշակերտները իրենց ուսուցչուհիներուն առաջնորդութեամբ ուղղուեցան իրենց դասարանները՝ շարունակելու համար առօրեայ յայատագիրները։

Թող վերամուտի բարի, ուրախ և ապահով ոգին թեւածէ Հայաշունչ բոլոր վարժարաններուն, Հայրենասէր ծնողներուն հոգիներուն մէջ ու Ս․ Մեսրոպի ոսկեզօծ տառերով սնանող իւրաքանչիւր Հա՛յ աշակերտ հպարտ զգայ իր հայ պատկանելիութեան ու ազգային բարձր ոգիին համար:

IMGP1369

IMG_3635

IMG_3611

IMG_3576

spot_img

ՆՄԱՆ ՆԻՒԹԵՐ

spot_img
spot_img

ՎԵՐՋԻՆ ՅԱՒԵԼՈՒՄՆԵՐ

spot_img

Զօրակցիր Զարթօնք Օրաթերթին