Սեպտեմբեր 24ի երեկոյեան, Երեւանի Արամ Խաչատրեան մեծ համերգասրահին մէջ տեղի պիտի ունենայ, ՀՀ Սփիւռքի նախարարութեան Համահայկական մշակութային փառատօնի բացման հանդիսաւոր արարողութիւնը: Այս մասին կը հաղորդէ ՀՀ Սփիւռքի նախարարութեան մամուլի գրասենեակը։
Հայոց Ցեղասպանութեան 100րդ տարելիցին նուիրուած ձեռնարկներու ծիրէն ներս իրականացուող փառատօնը կը ներառէ՝ Սթամպուլի հայ համայնքի մշակութային օրերը Հայաստանի մէջ եւ «Կ’երգենք Կոմիտաս» փառատօնը, որուն կը մասնակցին Հայաստանէն, Արցախէն եւ աշխարհի 12 երկիրներէ ժամանած երգչախումբեր, պարախումբեր եւ անհատ կատարողներ:
Փառատօնի մասնակիցներուն կ’ողջունէ ՀՀ Սփիւռքի նախարար Հրանոյշ Յակոբեան:
Մասնակիցներուն իր օրհնանքի խօսքը կը բերէ Պոլսոյ հայոց պատրիարքի ընդհանուր փոխանորդԱրամ արքեպիսկոպոս Աթէշեան:
Ելոյթ կ’ունենան Սթամպուլի Լուսաւորիչ եւ Հայաստանի Էքսփրոմտ երգչախումբերը, պոլսահայ երգիչներ Սիպիլը, Պօղոս Եղիազարեանը եւ Պարթեւ Կարեանը:
Ծրագիրի ընթացքին կը հնչեն պոլսահայ երաժշտահան Մաժակ Թոշիկեանի` Հրանդ Տինքին նուիրուած օրաթորիան եւ այլ ստեղծագործութիւններ` խմբավար Յակոբ Մամիկոնեանի ղեկավարութեամբ:
Փառատօնը նպատակ ունի նպաստելու Հայաստան-Սփիւռք մշակութային գործակցութեան ընդլայնման, Սփիւռքի մէջ մշակութային ինքնութեան պահպանման ու զարգացման:
