Պոլսոյ յայտնի հայ ճարտարապետներու ընտանիքին` Պալեաններուն պատկանող գերեզմանը պիտի նորոգուի: Ինչպէս կը հաղորդէ «Արմէնփրես»ը, այս մասին կը տեղեկացնէ «Ակօս» պարբերականը:
Սթամպուլի Սկիւտար թաղամասի Սուրբ Խաչ գերեզմանատան մէջ գտնուող հայ ճարտարապետներուն գերեզմանը՝ պիտի վերականգնի Հայ ճարտարապետներու եւ ճարտարագէտներու միութեան նախաձեռնութեամբ, ինչպէս նաեւ Անուշաւան Հրաչ Քըրմըզեանի հովանաւորչութեամբ:
Գերեզմանատան վերականգնման աշխատանքներու ծիրէն ներս, կը նախատեսուի այստեղ բերել այժմ Թուրքիոյ հնագիտութեան թանգարանին մէջ գտնուող` Կարապետ Պալեանին պատկանող գերեզմանաքարը, որ յայտնաբերուած էր Սթամպուլի թաղամասերէն մէկուն մէջ իրականացած շինարարական աշխատանքներու ժամանակ:
Պալեաններու գերեզմանի վերականգնման առնչութեամբ Սեպտեմբեր 18ին տեղի ունեցած է հիմնարկէքի արարողութիւն: Կը նախատեսուի, որ այդ աշխատանքները աւարտին հասնին Մայիս 2016ին:
Օսմանեան կայսրութեան մէջ Պալեաններու ընտանիքի անդամները նախագծած եւ կառուցած են բազմաթիւ շէնքեր, կամուրջներ, պալատներ, եկեղեցիներ եւ մզկիթներ: Պալեաններու ընտանքիը նոր շունչ բերած է օսմանեան ճարտարապետական արուեստին` համադրելով օսմանեան միջնադարեան հայազգի ճարտարապետ Սինանի աւանդոյթները եւ արեւմտեան ճարտարապետական ոճերը:
Պալեան ընտանիքի ճարտարապետներու մօտաւորապէս չորս սերունդի ներկայացուցիչներ համարուած են օսմանեան արքունիքի ճարտարապետներ: Անոնց ստեղծած նրբաճաշակ կառոյցները կը զարդարեն Սթամպուլը եւ անոր եւրոպական տեսք կու տան:
