ՀՀ Անկախութեան տօնին առթիւ երէկ` Սեպտեմբեր 21ին, ՀՀ նախագահ Սերժ Սարգսեան եւ ԼՂՀ նախագահ Բակօ Սահակեան, հանրապետութեան բարձրագոյն ղեկավարութեան ուղեկցութեամբ այցելեցին Եռաբլուր զինուորական պանթէոն` յարգանքի տուրք մատուցանելու իրենց կեանքը Հայրենիքի ազատութեան համար զոհաբերած հայորդիներու յիշատակին:
NEWS.am-ի փոխանցմամբ` Եռաբլուր զինուորական պանթէոն այցելած էին նաեւ ՀՀ ոստիկանապետ Վլատիմիր Գասպարեան, ԱԱԾ տնօրէն Գորիկ Յակոբեան, Հայաստանի ու ԼՂՀի պաշտպանութեան նախարարներ Սէյրան Օհանեան եւ Լեւոն Մնացականեան, ՀՀ ԱԺ նախագահ Գալուստ Սահակեան եւ այլ բարձրաստիճան պաշտօնեաներ:
Յիշեցնենք, որ Հայաստանը երէկ նշեց իր անկախութեան 24 ամեակը: 1991ի Սեպտեմբեր 21ին Հայաստանի մէջ տեղի ունեցաւ անկախութեան հանրաքուէ, որու մասնակիցներուն շուրջ 94 տոկոսը կողմ քուէարկեց Հայաստանը անկախ պետութիւն ունենալու օգտին:
