Անգարայի դատախազութիւնը հետաքննութիւն սկսած է Թուրքիոյ հսկայ ընկերութիւններէն մէկուն՝ Alarko ընկերութեան հիմնադիր, հրէական արմատներով թուրք գործարար Իսհաք Ալաթոնի նկատմամբ, կը յայտնէ News.am-ը:
Թրքական Sozcu պարբերականի փոխանցմամբ` թրքական դատախազութիւնը Իսհաք Ալաթոնի դէմ հետաքննութիւն սկսած է՝ կիւլէնականներուն ֆինանսական եւ բարոյական աջակցութիւն ցոյց տալու մեղադրանքով:
Իսհաք Ալաթոն միակ թուրք գործարարն է, որ հրապարակաւ թրքական իշխանութիւններուն կոչ ըրած է ճանչնալու Հայոց Ցեղասպանութիւնը, ներողութիւն խնդրելու եւ յարգելու զոհուածներու յիշատակը: «90 տարի մենք բազմաթիւ մեղքեր գործած ենք: Կմախքները լեցուցած ենք պահարանները եւ փակած դռները: 90 տարի է աշխարհին կոյր կ’ըսենք: Կը վախնանք առերեսուելու: Մեզի սորվեցուցած են վախնալ: Կմախքները պահարաններու մէջ կը փտին, իսկ ատոնց հոտը արդէն անտանելի դարձած է: Ես արդէն չեմ կրնար շնչել», ըսած էր Իսհաք Ալաթոն:
