Միջազգային «Լրագրողներ առանց սահմաններու» (Reporters Without Borders) կազմակերպութիւնը յայտարարութիւն մը հրապարակած է` յայտնելով իր խորին մտահոգութիւնները Թուրքիոյ մէջ մամուլի նկատմամբ իրականացուող գրաքննութեան դէպքերուն առնչութեամբ: Ինչպէս կը հաղորդէ «Արմէնփրես»ը, կազմակերպութիւնը նշած է, որ այնպիսի գործողութիւններ, ինչպէս օրինակ «Տողան» մետիա ընկերութեան դէմ սկսած հետաքննութիւնը, «Նոքթա» ամսագրի խմբագրութեան վրայ ոստիկանութեան յարձակումը կամ «Ջումհուրիէթ» թերթի կայքի արգելափակումը, երկրին մէջ գրաքննութեան չափերը աւելի կ՛ընդլայնեն:
«Գրաքննութեան այս ալիքը անհանդուրժող է, հակասահմանադրական եւ կը խախտէ կառավարութեան միջազգային բոլոր պարտաւորուածութիւնները: Նմանօրինակ քայլերը ոչ միայն կը սահմանափակեն մետիայի ազատութիւնը, այլեւ կը մեծցնեն լարուածութիւնը եւ կը խորացնեն հասարակութեան մէջ առկայ տարանջատումը: Մենք կոչ կ՛ուղղենք իշխանութիւններուն դադրեցնելու իրադրութիւնը աւելի վատացնելու քաղաքականութիւնը եւ փոխարէնը օգնել թոյլ տալու ժողովրդավարական քննարկումները», նշած է «Լրագրողներ առանց սահմաններու» կազմակերպութեան Արեւելեան Եւրոպայի եւ Կեդրոնական Ասիոյ գրասենեակի ղեկավար Ճոհան Պիրը:
Կազմակերպութիւնը յայտարարութեան մէջ յիշեցուցած է, որ Թուրքիան 2015 թուականի մամուլի ազատութեան ցուցակին մէջ, 180 երկիրներու շարքին ընդամէնը 149-րդն է:
