Կարէն Տէմիրճեանի անուան մարզահամերգային համալիրին մէջ տեղի ունեցաւ Yerevan Jazz Fest-2015 միջազգային փառատօնը, որու ծիրէն ներս կայացաւ երեք համերգ` Հայաստանէն, Արցախէն, Վրաստանէն, Ֆրանսայէն, ԱՄՆէն, Ռուսիայէն, Աւստրիայէն եւ Լիբանանէն ժամանած երաժիշտներու մասնակցութեամբ, կը հաղորդէ Panorama.am-ը:
Լրագրողներու հետ հանդիպման ժամանակ դաշնակահար, երաժիշտ, ճազմէն Լեւոն Մալխասեան ըսաւ, որ ուրախ է երկարատեւ դադարէ ետք Երեւանի մէջ կրկին միջազգային ճազ փառատօն իրականացնելու առիթով: Անոր կարծիքով փառատօնը երեւանցիներուն պիտի հետաքրքրէ:
Ճազ միութեան նախագահ Կամօ Մովսիսեան նշեց, որ իրենց նպատակն է տարիէ տարի ընդլայնել մասնակից երկիրներուն թիւը. «Բայց արդէն իսկ մեզ համար շատ կարեւոր է միջազգային ճանաչում ունեցող մարդկանց մասնակցութիւնն առաջին փառատօնին»:
Ճազ փառատօնի բացումը կատարեցին Հայաստանի հեռուստատեսութեան եւ ռատիոյի պետական էստրատային-սիմֆոնիք նուագախումբը (գեղարուեստական ղեկավար Երուանդ Երզնկեան), Արցախի ճազ նուագախումբը (գեղ. ղեկ․ Տիգրան Լալայեան), Նինօ Կատամաձէն իր «Insight» խումբով (Վրաստան), Լորէն Ռոպինը (Ֆրանսա), Աբրահամ Գումրոյեանը (ԱՄՆ), Սերկէյ Մանուկեանը (Ռուսիա), Արթուր Սաթեանը (Լիբանան), Լեւոն Մալխասեանը, Վահագն Հայրապետեանը, Արմէն Թութունճեանը ու Կարէն Մամիկոնեանը:
Սեպտեմբեր 18ին Մարզահամերգային համալիրի մէջ տեղի ունեցաւ ԱՄՆէն ժամանած Ռիչըրտ Պոնա խումբի համերգը: Խումբի կազմին մէջ հանդէս եկան Ռիչըրտ Պոնան, Էթյէն Սթետուիքը, Լիւտուիք Աֆոնսոն, Լի Կրինպլատն ու Ատամ Սթոլըրը:
Սեպտեմբեր 19ին երեկոն բացաւ Հայաստանի պետական ճազ նուագախումբը (գեղ. ղեկ․ Արմէն Հիւսնունց), ինչպէս նաեւ կատարումներով հանդէս եկան Մարիամ եւ Արմէն Մերաբովները (Ռուսիա), Էռնա Եուզպաշեանը եւ Հիւպերէ Թապսը (Աւստրիա):
