Հայոց Ցեղասպանութեան 100-րդ տարելիցի ձեռնարկներու ծիրէն ներս եւ Ճափոնի մէջ ՀՀ դեսպանութեան ու ՀՀ մշակոյթի նախարարութեան համագործակցութեամբ եւ հովանաւորութեամբ՝ Սեպտեմբեր 7-11 համերգային շրջագայութեամբ Ճափոնի մայրաքաղաք Թոքիօ կը գտնուէր Արամ Խաչատրեանի անուան եռեակը` դաշնակահար Արմինէ Գրիգորեան, ջութակահար Կարէն Շահգալդեան եւ թաւջութակահար Կարէն Քոչարեան:
ՀՀ ԱԳՆ մամուլի ծառայութեան փոխանցմամբ` Սեպտեմբեր 8-ին եռեակը համերգով հանդէս եկած է Թոքիոյի «Լիւթեր Իչիկայա» կեդրոնին, իսկ Սեպտեմբեր 11-ին «Սանդորի հոլ» հեղինակաւոր համերգասրահին մէջ: Երաժիշտները կատարած են Արամ Խաչատրեանի, Առնօ Պապաճանեանի եւ Փէօթր Չայքովսկիի ստեղծագործութիւնները:
Համերգներուն ներկայ եղած են հարիւրաւոր ճափոնցիներ, Թոքիոյի մէջ հաւատարմագրուած դիւանագէտներ, հայ համայնքի ներկայացուցիչներ:
