Գանատայի ՀՀ դեսպանատան մէջ Սեպտեմբեր 12-ին տեղի ունեցած է Մեթիու Քարանեանի «Պատմական Հայաստան. 100 տարի անց» գիրքին շնորհանդէսը: Այս մասին կը տեղեկացնէ ՀՀ արտաքին գործոց նախարարութեան մամուլի, տեղեկատուութեան եւ հասարակայնութեան հետ կապի վարչութիւնը:
Մեթիու Քարանեան հայկական առաջին ճամբորդական ուղեցոյցի հեղինակն է, որպէս իրաւաբան կ՛աշխատի ԱՄՆ Քալիֆորնիա նահանգին մէջ, իսկ 2002-2006 թուականներուն դասախօսած է Հայաստանի ամերիկեան համալսարանին մէջ:
Իր ուղերձին մէջ Գանատայի մօտ ՀՀ դեսպան Արմէն Եգանեան ներկայացուցած է հիւրերուն հեղինակին կատարած աշխատանքը եւ խօսքը փոխանցած է անոր: Մեթիւ Քարանեան հանդէս եկած է պատմական Հայաստանի մինչեւ այսօր կանգուն մշակութային արժէքները ներկայացնող, ինչպէս եւ կորսուած ժառանգութիւնը փաստող լուսանկարներով համեմուած դասախօսութեամբ: Արեւմտեան Հայաստանի վեց նահանգներու, ծպտեալ հայերու, հայկական եկեղեցաշինութեան վերաբերեալ ներկայացումը արժանացած է ներկաներու ջերմ ընդունելութեան:
Դեսպանութեան հովանաւորութեամբ Մեթիու Քարանեան իր նոր գիրքը հանրութեան ներկայացուցած է նաեւ Մոնրէալ եւ Թորոնթօ քաղաքներուն մէջ:
