Հայաստանի Գիտթութիւններու ազգային ակադեմիայի (ԳԱԱ) բնագիտութեան (physics) հետազօտութիւններու հիմնարկի տնօրէն, ՀՀ ԳԱԱ թղթակից անդամ Արամ Պապոյեան արժանացած է 2015-ի ICO Galileo Galilei Award միջազգային հեղինակաւոր մրցանակին` «Ալքալի (alkali-կալաքար-ԵՌԳ.) աթոմներու բարձր լուծունակութեան սփեքթրասքոփիայի (spectroscopy) ոլորտին մէջ իր կարեւոր նուաճումներուն եւ Հայաստանի մէջ փորձարարական աթոմային ֆիզիքայի յառաջմղման գործին մէջ ունեցած արժէքաւոր ներդրման համար»: Այս մասին կը տեղեկացնէ ՀՀ ԳԱԱ տեղեկատուական-վերլուծական կեդրոնը:
ICO Galileo Galilei Award մրցանակը կը շնորհուի Օպթիքայի (տեսագիտութեան-ԵՌԳ․) եւ ֆոթօնիքայի (photonics) ոլորտի հետազօտողներուն` համեմատաբար անբարենպաստ պայմաններու մէջ ունեցած ձեռքբերումներուն համար:
Արամ Պապոյեան ծնած է 1959-ի Դեկտեմբեր 25-ին` Երեւան: Անոր հետազօտութիւններու բնագաւառը լազերային բնագիտութիւն, աթոմային բնագիտութիւն, քուանթային (quantum) եւ ոչ գծային տեսագիտութիւնն է: Արամ Պապոյեան 2004-ին արժանացած է ՀՀ նախագահի մրցանակի: Ան Եւրոպական տեսագիտութեան ընկերութեան անդամ է, անդամ է նաեւ Ֆրանսայի «Ալֆրետ Քասթլըր» ազգային ֆոնտին: 2010-ին ընտրուած է ՀՀ ԳԱԱ թղթակից անդամ:
