Վարշաւայի մէջ 2015ի Սեպտեմբեր 8-ին կայացած՝ Պատմական եւ ռազմական ֆիլմերու միջազգային 6-րդ փառատօնի մրցանակաբաշխութեան արարողութեան ժամանակ, շարժանկարի փառատօնին Հայաստանէն ներկայացուած Վրէժ Պետրոսեանի «Ուրիշ Հայրենիք. Մարիա Եաքոպսընի օրագրութիւնը» ֆիլմը արժանացած է փառատօնի հովանաւոր, Լեհական բանակի ուղղափառ թեմի մրցանակին:
Ճիւան Աւետիսեանի Արցախի պատերազմին նուիրուած «Թեւանիկ» ֆիլմը, արժանացած է փառատօնի կազմակերպիչ «Ռազմական գիտութեան ընկերակցութեան» մրցանակին: Այս մասին Ֆէյսպուքի (Դիմատետր) իր էջին մէջ գրած է Լեհաստանի մօտ Հայաստանի դեսպան Էտկար Ղազարեան:
«Ի դէպ «Թեւանիկ» ֆիլմը ցուցադրուած է նաեւ այս տարի Յուլիսին, Լեհաստանի Լիւպլին քաղաքին մէջ «Արեւելքի մշակոյթ» ծրագիրի ծիրէն ներս: Կը շնորհաւորենք շարժանկարի հայ գործիչները եւ կը մաղթենք յետագայ յաջողութիւններ ու միջազգային պարգեւներ», նշած է Էտկար Ղազարեան:
