Սեպտեմբեր 24-ին ՀՀ Սփիւռքի նախարարութեան նախաձեռնութեամբ տեղի պիտի ունենայ «Համահայկական մշակութային փառատօն»ի բացումը: Սեպտեմբեր 24-27 շարունակուող փառատօնը նուիրուած է Հայոց Ցեղասպանութեան 100-րդ տարելիցին: «Հայերն Այսօրի» փոխանցմամբ` «Համահայկական մշակութային փառատօն»ի ընթացքին կ’իրականացուին Սթամպուլի հայ համայնքի մշակութային օրեր Հայաստանի մէջ, որուն ծիրէն ներս ելոյթ կ’ունենան Սթամպուլի դպրաց դասի «Լուսաւորիչ» երգչախումբը եւ Եսայեան սանուց միութեան «Մարալ» պարախումբը, որ այս տարի կը նշէ իր հիմնադրման 35-ամեակը:
Սեպտեմբեր 27-ին Համահայկական փառատօնը կ’եզրափակուի «Կ’երգենք Կոմիտաս» համերգային ծրագիրով, որուն կը մասնակցին Հայաստանէն, Արցախէն եւ աշխարհի 12 երկիրներէ ժամանած երգչախումբեր, պարախումբեր եւ անհատ կատարողներ:
