Սուրիոյ Հալէպ քաղաքը հոսանքազրկուած է, կը շարունակուի նաեւ ջուրի տագնապը: Այս մասին «Արմէնփրես»ին հետ զրոյցին նշեց Հալէպի իր աղբիւրը:
«Մարդիկ կ’օգտուին ջրհորներէն կամ շիշերով կը գնեն: Բացի այդ քաղաքին մէջ կը շարունակուի վառելանիւթի տագնապը», նշեց աղբիւրը:
Ինչ կը վերաբերի քաղաքին մէջ տիրող իրավիճակին՝ ան նշեց, որ Սեպտեմբեր 2-ին եւ 3-ին հայաշատ թաղամասերուն մէջ իրավիճակը համեմատաբար հանգիստ է:
«Բերիոյ Լուրեր» ֆէյսպուքեան էջը կը տեղեկացնէ, որ Սեպտեմբեր 1-ի երեկոյեան զինեալ խմբաւորումները հրասանդ արձակած են Հալէպի քրիստոնէաբնակ Սուլէյմանիէ-Վիլլաներ թաղամասերու մերձակայքը: Բարեբախտաբար պայթումը տեղի ունեցած է օդին մէջ եւ մարդկային վնասներ չեն արձանագրուած: Նիւթական վնասներ կրած են շրջաններու շէնքներն ու մեքենաները:
Հալէպ 2012-ի ամառուընէ ի վեր յայտնուած է կառավարական ուժերու եւ զինուած տասնեակ խմբաւորումներու բախումներու թիրախ, որոնք մինչեւ այսօր կը շարունակուին: Քաղաքի արեւմտեան թաղամասերը կը գտնուին կառավարական ուժերու, իսկ արեւելեան թաղամասերը` զինուած խմբաւորումներու հսկողութեան տակ:
