Ազրպէյճանի մէջ «հայութեան դէմ օգտագործելու նպատակով» հայոց լեզուի դասագիրք մը լոյս տեսած է:
Moderator.az լրատուական կայքի փոխանցմամբ` հայոց լեզուի դասագիրքը Ազրպէյճանի նախագահին կից Ռազմավարական հետազօտութիւններու կեդրոնի պատուէրով պատրաստած է՝ Եւրասիական անվտանգութեան եւ ռազմավարական հետազօտութիւններու կեդրոնը, կը գրէ «Արցախփրես»ը:
Ազրպէյճանի նախագահին կից Ռազմավարական հետազօտութիւններու կեդրոնի աջակցութեամբ հրատարակուած եւ ընթերցողներու լայն շրջանակի համար նախատեսուած, հայոց լեզուի ուսումնական ձեռնարկը բաղկացած է չորս մասերէ` հնչիւնաբանութիւն, ձեւաբանութիւն, շարահիւսութիւն եւ բառակազմութիւն:
Կայքը կը յայտնէ, որ Ազրպէյճանի մէջ հայոց լեզուի դասագիրքի լոյս ընծայումը՝ հայագէտներու, որոնք պէտք է զբաղին հակահայկական քարոզչութեամբ, պատրաստման նպատակ կը հետապնդէ:
Ուսումնական ձեռնարկի հեղինակը քաղաքագիտութեան դոկտոր Հաթամ Ջաբբարլըն է, խմբագիրներն են՝ Իսրաֆիլ Մամետովը, Սարլան Հասանովը, Սոհպաթ Մամետովը եւ Թահիրա Ջաբբարլըն:
