Ազրպէյճանի գործողութիւնները բացայայտ կ’ապացուցեն, որ Պաքու կը ձգտի տապալել բանակցային գործընթացը: Այս մասին «News.am»ին յայտնեց Հայաստանի արտաքին գործոց նախարարութեան բանբեր Տիգրան Պալայեան, մեկնաբանելով սահմանամերձ գիւղերու գնդակոծութեան եւ երկու բնակիչներուն վիրաւորուելուն մասին տեղեկութիւնները: «Որքան կեղծաւոր պէտք է ըլլաս, որ խօսիս միջազգային մարդասիրական իրաւունքի մասին, եւ նոյն օրը ականանետերէ կրակես խաղաղ բնակչութեան վրայ: Այս ամէնը անգամ մը եւս կը հաստատեն, որ Ազրպէյճան կը ձգտի սրել իրավիճակը եւ անով տապալել բանակցային գործընթացը», ընդգծեց Պալայեան:
