Սորպոնի համալսարանի հայ դասախօս Մարք Մուկալեան առաջիններէն էր, որ փորձած է Օգոստոս 21-ին կանգնեցնել Փարիզ-Պրիւքսէլ շոգեկառքի ահաբեկիչը: Այս մասին կը հաղորդէ Armenpress.am-ը՝ վկայակոչելով The Telegraph պարբերականը։
Անցեալ Ուրբաթ տեղի ունեցած միջադէպին ժամանակ՝ հրաձիգով զինուած մարոքցի Այուպ Էլ Ղազանիին առաջինը փորձած էր կանգնեցնել 51-ամեայ Մարք Մուկալեան: Ան փորձած էր վնասազերծել ահաբերկիչը, անոր ձեռքէն խլելով հրազէնը: Գիտնականին քրոջ փոխանցմամբ` յարձակելով զինուած ահաբեկիչին վրայ, Մարք Մուկալեան ստացած էր թափանցող հրազէնային վնասուածք նեարդային հանգոյցի վրայ, որ կրնայ խանգարել ձախ ձեռքի ամբողջական աշխատանքը: Մուկալեանը տեղափոխուած է հիւանդանոց եւ մինչ այժմ կը գտնուի բժիշկներու հսկողութեան տակ։ Այնուհետեւ երեք ԱՄՆ քաղաքացիներ, որոնց մէջ երկու զինուորականներ եւ մէկ բրիտանացի գործարար, յաջողած են վնասազերծել ահաբեկիչը:
