Երեւանեան 9-րդ երաժշտական փառատօնի մեկնարկը պիտի տրուի մեծահռչակ ջութակահար Վատիմ Ռեբինի (Ռուսաստան) մենակատարութեամբ: Փառատօնը պիտի մեկնարկէ Սեպտեմբեր 10-ին: Հայաստանի պետական ֆիլհարմոնիկ նուագախումբի պաշտօնական կայքէն կը տեղեկանանք, որ մինչեւ Հոկտեմբեր 28-ը շարունակուող փառատօնի ընթացքին պիտի կայանան մէկ տասնեակէ աւելի համերգներ, ելոյթ պիտի ունենան յայտնի երաժիշտներ` Պարրի Տուկլաս, դաշնամուր (Իռլանտա), Վենցել Ֆուխս, քլարինէթ (Գերմանիա), Քիմ Քաշքաշեան, ալտ (ԱՄՆ), Իտա Գաւաֆեան, ալտ (ԱՄՆ), Անի Գաւաֆեան, ջութակ (ԱՄՆ), Լեւոն Չիլինկիրեան, ջութակ (Մեծ Բրիտանիա) եւ ուրիշներ:
Երեւանեան միջազգային երաժշտական փառատօնի կազմակերպիչն է Հայաստանի պետական ֆիլհարմոնիկ նուագախումբը: Փառատօնը կ՝իրականացուի ՀՀ Առաջին Տիկին Ռիթա Սարգսեանի բարձր հովանաւորութեամբ եւ մշակոյթի նախարարութեան աջակցութեամբ: Փառատօնի գեղարուեստական ղեկավարներն են Ալեքսանդր Չաուշեան եւ Էդուարդ Թօփչեան:
