Օգոստոսի 16-ին Հայաստանեայց Առաքելական Սուրբ Եկեղեցին մեծ շուքով նշեց Ս. Աստուածածնի Վերափոխման բերկրառատ տօնը: Միածնաէջ Մայր Տաճարում, մասնակցութեամբ Մայր Աթոռի միաբանների, բարերարների և ուխտաւոր հաւատացեալների, մատուցվեց Ս. Պատարագ: Պատարագիչն էր Մայր Աթոռի Վարչատնտեսական բաժնի տնօրեն Գերաշնորհ Տ. Մուշեղ եպիսկոպոս Բաբայեանը:
Սրբազան Հայրը, իր քարոզում անդրադառնալով տօնի խորհրդին, ընդգծեց, որ սերը, հնազանդութիւնը, հեզութիւնը եւ խոնարհութիւնն այն առաքինութիւններն են, որոնք փոխել են, փոխում են եւ պիտի փոխեն այս աշխարհը` դարձնելով այն առաւել բարի եւ օրհնաբեր:
«Եւ այսօր մենք էլ` որպես Նրա աշակերտները, խօսք ենք լսում մեր Տիրոջից, որ ասում է. «Ահա քո Մայրը»: Սրբացնող եւ սրբարար այս խորանից տեսնում եմ այս աստուածակառոյց տաճարը` լեցուն բազում մայրերով, որոնց հաւատարմութեան, սրբութեան, հեզութեան, խոնարհութեան եւ հնազանդութեան օրինակն Աստուածամայր Ս. Կոյսն է: Մեզ համար մայր է ոչ միայն Ս. Աստուածածինը, այլեւ այն սուրբ երկիրը, որտեղ մենք ապրում ենք եւ որից ուժ, եռանդ ու հոգի ենք ստանում: Մայր է մեզ համար այն եկեղեցին, որի Ս. Աւազանից ծնվելով` անդամագրւում ենք Քրիստոսի Եկեղեցուն: Մայր է նաեւ Միածնաէջ այս Տաճարը, որի Աւագ Ս. Խորանը Տիրամօրն է նուիրուած: Սուրբ Կոյսի կեանքի օրերը դեռեւս նոր էին սկսվել, երբ ընծայուեց տաճարին, նոր էր Նա ճաշակել դեռատութեան քաղցրութիւնը, երբ դրան փոխարինեց մայրութեան բերկրանքին սպասելու օրհնաբեր աւետիսը: Այսօր, սիրելինե՛ր, Աստուածամայրը մեզ հետ չէ, այլ Նրա կենդանի օրինակն է մեզ հետ, եւ Նրա բարեխօսութիւնը` որպես բոլոր քրիստոնեաների մայր»,- նշեց Մուշեղ Սրբազանը:
Հաւարտ սրբազան արարողութեան, Ս. Տրդատի բաց խորանում կատարուեց «Խաղողօրհնեքի» հանդիսաւոր կարգը, որի ժամանակ շարականի երգեցողութիւնից յետոյ ընթերցուեց օրուայ խորհուրդն ամփոփող աւետարանական հատուածը, ապա Ս. Ներսէս Շնորհալու «Խաղողի օրհնութեան» աղօթքը:
Արարողութիւնից յետոյ խաղողի օրհնուած ողկոյզները բաժանուեցին հաւատացեալներին:
