Հայ բեմադրիչ Արտակ Իգիթեան կը նախատեսէ Հայոց Ցեղասպանութեան մասին «Անատոլիական պատմութիւն» (Anatolian Story) վերնագիրով ֆիլմ նկարահանել, ուր պիտի խաղան ֆրանսական շարժանկարի յայտնի դէմքեր ժերար Տէփարտիէոն եւ Սամի Նասէրին:
Ինչպէս կը հաղորդէ «Արմէնփրէս»ը վկայակոչելով rusarminfo.ruն (ռուս-հայկական տեղեկատուական գործակալութիւն), ֆիլմի գլխաւոր հերոսը Մուսթաֆա Ղազին է, որ իր կեանքը նուիրած է Թուրքիոյ ծառայելու: Ծեր հասակին Մուսթաֆա, որ ամբողջ կեանքի ընթացքին ատած է Հայաստանն ու հայերը կը պարզէ, որ հայ է: Ֆիլմի բեմագրութեան (սենարի) հեղինակը Մարգ Արէնն է (Կարէն Մարգարեան):
Ֆիլմի երաժշտութիւնը պիտի յօրինէ Միշէլ Լեկրան: Ըստ կայքին ֆրանսահայ յայտնի երգահանը պահանջած է, որ ֆիլմի գլխագիրներու մէջ Լեգրանի կողքին աւելցնեն նաեւ իր հայկական Տէր Միքայէլեան աղգանունը: Ֆիլմի մէջ գլխաւոր հերոսի՝ Մուստաֆայի կերպարը պիտի մարմնաւորէ Ժերար Տարմոն, իսկ անոր որդին Սամի Նասէրին, որ հայ հանդիսատեսին առաւելաբար ծանօթ է «Թաքսի» ֆիլմերու շարքէն: Տէփարտիէոն ֆիլմի մէջ կը մարմնաւորէ փաստաբանը:
Կը նախատեսուի, որ ֆիլմի նկարահանման աշխատանքները սկսին 2015ի Նոյեմբերին: Նկարահանումները կ’իրականանան Հայաստանի, Թուրքիոյ, Ֆրանսայի եւ Գերմանիոյ մէջ:
