Յուլիս 18-ին Պուէնոս Այրէսի Սուրբ Գրիգոր Լուսաւորիչ մայր տաճարի բակին մէջ, Հայոց ցեղասպանութեան յուշարձանին մօտ տեղի ունեցաւ Համահայկական VI-րդ խաղերու ջահի վառման հանդիսաւոր արարողութիւնը: Ջահը վառելու եւ կրելու պատուաւոր պարտականութիւնը կատարեց արժանթինահայ յայտնի մարզիկ Ալպերթօ Բարսեղեան: Այս մասին կը յայտնեն ԱԳՆ մամլոյ ծառայութենէն:
Արարողութեան մասնակցեցան Արժանթինի մէջ ՀՀ դեսպան Ալեքսան Յարութիւնեան, Արժանթինի Հայոց թեմի առաջնորդ, Գերաշնորհ Տէր Գիսակ Արքեպիսկոպոս Մուրատեան, արժանթինահայ համայնքնային կազմակերպութիւններու ղեկավարները, Համահայկական VI-րդ խաղերու Արժանթինի կազմակերպչական կոմիտէի անդամները, մարզիկներ եւ հիւրեր:
Արարողութեան սկիզբը Տէր Գիսակ Արքեպիսկոպոս Մուրատեանի հանդիսապետութեամբ եկեղեցւոյ մէջ տեղի ունեցաւ համահայկական խաղերուն մասնակցող արժանթինական պատուիրակութեան շուրջ 200 անդամներու, ինչպէս նաեւ խաղերու բացումը խորհրդանշող ողիմպիական կրակի օրհնութեան եւ բարեմաղթանքի արարողութիւն:
Այնուհետեւ ելոյթներով հանդէս եկան Արժանթինի մէջ ՀՀ դեսպան Ալեքսան Յարութիւնեան, Տէր Գիսակ Արքեպիսկոպոս Մուրատեան, արժանթինահայ համայնքային եւ մարզական կառոյցներու ղեկավարները:
Իր խօսքին մէջ դեսպան Յարութիւնեան կարեւոր համարեց համահայկական խաղերու դերն ու նշանակութիւնը աշխարհասփիւռ հայութեան համախմբման, հայ երիտասարդներուն հայրենիք բերելու, Հայաստան-Սփիւռք կապերը ամրապնդելու առումով:
ՀՀ դեսպանը ընդգծեց նաեւ Համահայկական VI-րդ խաղերու իրականացման կարեւորութիւնը յատկապէս Հայոց ցեղասպանութեան 100-րդ տարելիցի ձեռնարկներու ծիրէն ներս:
