Յուլիս 14-ին վիեթնամական «ANTG» հեռուստաալիքով մեկնարկեց հայկական մշակութային շաբաթը` նուիրուած Հայաստանի եւ Վիեթնամի միջեւ դիւանագիտական յարաբերութիւններու հաստատման 23-ամեակին:
ՀՀ արտաքին գործոց նախարարութեան մամուլի, տեղեկատուութեան եւ հասարակայնութեան հետ կապի վարչութեան փոխանցմամբ` մշակութային շաբաթի ծիրէն ներս «ANTG» հեռուստաալիքով պիտի ցուցադրուի Վիեթնամի մէջ ՀՀ դեսպան Ռաիսա Վարդանեանի ելոյթը հայ-վիեթնամական յարաբերութիւններու զարգացման եւ անցեալ 23 տարիներու ընթացքին երկկողմ յարաբերութիւններու մէջ արձանագրուած ձեռքբերումներուն վերաբերեալ:
Մշակութային շաբաթի երաժշտական հատուածին մէջ պիտի ցուցադրուին Շառլ Ազնաւուրի, «KOHAR» սիմֆոնիկ նուագախումբի, ինչպէս նաեւ Հայաստանի պետական ֆիլհարմոնիկ նուագախումբի եւ Հայաստանի պետական երիտասարդական նուագախումբի համերգները: Առանձին հաղորդումով պիտի ներկայացուին Արամ Խաչատրեանի եւ Առնօ Բաբաջանեանի ստեղծագործութիւնները:
Մշակութային շաբաթի աւարտին պիտի ցուցադրուին «Հայաստան` Նոյի երկիր» եւ «Հռոմէն աւելի հին մայրաքաղաքը» փաստավաւերագրական ֆիլմերը, ինչպէս նաեւ «Արտոյտներու ագարակը» գեղարուեստական ֆիլմը:
