Երեքշաբթի, 21. 05. 2024

spot_img

Յայտնի է Եւրոտեսիլ-2015-ի Հայաստանի 4-րդ Մասնակիցը՝ Ստեֆանի Թօփալեան Ասիա

“Եւրոտեսիլ-2015” երգի միջազգային մրցոյթին Հայաստանը ներկայացնող Genealogy խումբի 6 մասնակիցներէն չորրորդը ճաբոնահայ երգչուհի Ստեֆանի Թօփալեանն է՝ Ասիա աշխարհամասէն: Անոր մոգական ձայնը Ճաբոնի մէջ արդէն գերած է հազարաւոր սրտեր: Ստեֆանին երգչուհի է, երգահան եւ դերասանուհի, ան այժմ կը բնակի Թոքիոյի մէջ: Այս մասին կը յայտնէ Հայաստանի Հանրային հեռուստաընկերութիւնը:

Ստեֆանին ծնած է ԱՄՆ-ի Կալիֆորնիա նահանգի Լոս Անճելըս քաղաքին մէջ. հայրը հայ է, մայրը` ճաբոնուհի: Այժմ Ճաբոնի մէջ բնակող Ստեֆանին հաւատարիմ է հայկական արմատներուն: Հայկական եւ ճաբոնական կերակրատեսակներու սիրահար է: Ստեֆանին կը համակրի Մայքլ Ճեքսընին եւ բրիտանական Queen ռոք խումբին: Երգել սկսած է 13 տարեկանին:

2015-ին Ստեֆանին պիտի ներկայացնէ Հայաստանը “Եւրոտեսիլ” երաժշտական հեղինակաւոր 60-րդ մրցոյթին: Ան ելոյթ պիտի ունենայ Վիեննայի մէջ հայ 5 այլ տաղանդաւոր մասնակիցներու հետ: Այս պահուն ստեղծագործական անձնակազմին հետ Ստեֆանին կը մասնակցի մրցոյթի նախապատրաստական աշխատանքներուն: Մրցոյթի կիսաեզրափակիչ փուլը տեղի պիտի ունենայ Մայիս 19-ին:

Հանրային հեռուստաընկերութիւնը նախապէս յայտնած էր, որ Genealogy խումբը պիտի համախմբէ 1915-ին աշխարհի 5 աշխարհամասեր (Եւրոպա, Ասիա, Ամերիկա, Ափրիկէ, Աւստրալիա) սփռուած հայ ժողովուրդի նոր սերունդը: Խումբին մէջ ծագումով հայ 6 արտիստներն են` իրենց 6 ճակատագրերով, բայց 1 պատմութեամբ: Խումբի առաջին մասնակիցը ֆրանսահայ երգիչ Եսայի Ալթունեանն է, որ կը ներկայացնէ Եւրոպա աշխարհամասը, երկրորդ մասնակիցը ամերիկահայ երգչուհի Թամար Կապրելեանն է, երրորդը` Վահէ Թիլբեանը Ափրիկէ աշխարհամասէն: Ներկայացուելիք երգի վերնագիրն է ‘’Don’t deny” (“Մի՛ ժխտեր”):

Մրցոյթը այս տարի տեղի պիտի ունենայ Վիեննայի մէջ Մայիս 19-ին, 21-ին եւ 23-ին` “Կառուցելով կամուրջներ” նշանաբանի ներքոյ: Կը մասնակցի 40 պետութիւն:

Genealogy խումբի հինգերորդ մասնակիցին անունը յայտնի պիտի դառնայ Մարտ 3-ին: Ան պիտի ներկայացնէ Աւստրալիա աշխարհամասը:

spot_img

ՆՄԱՆ ՆԻՒԹԵՐ

spot_img
spot_img

ՎԵՐՋԻՆ ՅԱՒԵԼՈՒՄՆԵՐ

spot_img

Զօրակցիր Զարթօնք Օրաթերթին