Հայ կաթողիկէ Մեսրոպեան բարձրագոյն վարժարանին մէջ իրականացաւ աշակերտներու փոխ-ծանօթութեան եւ դպրոցներու միջեւ գործակցութեան հաստատման՝ քանի մը հանգրուաններու վրայ տարածուած աշխատանքը, Par Le Monde միջազգային ծրագրի շրջանակներուն մէջ:
Ծրագրին նպատակն էր Մեսրոպեանի եւ Ֆրանսայի ու ֆրանսախօս երկիրներու մէջ գործող դպրոցներու աշակերտներուն միջեւ հաստատել փոխադարձ ծանօթութիւն:
Այս նպատակով Մեսրոպեան վարժարան այցելեցին ծրագրի երկու աշխատակիցներ՝ Մարիլին Հոշար եւ Լորեն Առնուլ, որոնց հետ Մեսրոպեան վարժարանի 4րդ դասարանի աշակերտները կիսեցին իրենց կրթական առօրեան եւ գիտելիքները, որոնք ելեկտրոնային հաղորդակցութեան միջոցներով փոխանցուեցան ֆրանսացի տարեկից աշակերտներու:
Հոշար եւ Առնուլ կազմակերպեցին աշխատանքային խմբակներ, որոնց մէջ Մեսրոպեանի աշակերտները զեկուցումներ ներկայացուցին Լիբանանի աւանդութիւններուն, մարզական կեանքին, գրականութեան եւ արուեստներուն մասին, ապա նաեւ կազմակերպեցին խաղեր, երգեցողութիւն եւ պար, որոնք բոլորն ալ տեսագրուեցան եւ լուսանկարուեցան՝ անոնց միջոցով ֆրանսացի աշակերտները ծանօթացնելու համար Մեսրոպեանական իրականութեան:
Ֆրանսացի մասնագէտները բարձր գնահատեցին մեր վարժարանի կրթական առօրեան եւ մանաւանդ բազմալեզու կրթական ծրագիրը:
Կատարուած աշխատանքներուն մասին յաւելեալ տեղեկութիւններ, վիտէօ-նիւթեր եւ լուսանկարներ կարելի է տեսնել Par Le Monde կազմակերպութեան պաշտօնական կայքին վրայ,
https://www.parlemonde.fr/portfolio/lecole-mesrobian/
ՏԵՂԵԿԱՏՈՒԱԿԱՆ ԳՐԱՍԵՆԵԱԿ
ՀԱՅ ԿԱԹՈՂԻԿԷ ՄԵՍՐՈՊԵԱՆ ԲԱՐՁՐԱԳՈՅՆ ՎԱՐԺԱՐԱՆԻ
