ՀՀ Սփիւռքի նախարար Հրանոյշ Յակոբեանն ընդունեց Տանն Կիլիկիոյ Կաթողիկէ Հայոց Կաթողիկոս-պատրիարք Ներսէս Պետրոս ԺԹ Թարմունուն:
Կողմերն անդրադարձան Հայոց Ցեղասպանութեան 100-րդ տարելիցի միջոցառումները համակարգող պետական յանձնաժողովի ընդունած համահայկական Հռչակագրի դրոյթներին եւ դրանց պատմական նշանակութեանը: Կարեւորուեց յատկապէս այն փաստը, որ Հռչակագիրը Ծիծեռնակաբերդի յուշակոթողի մօտ ընթերցեց անձամբ ՀՀ Նախագահ Սերժ Սարգսեանը, որով աւելի շեշտուեց փաստաթղթի համազգային արժէքը:
Ամենապատիւ տէրն իր գոհունակութիւնը յայտնեց Սփիւռքի նախարարութեան հայապահպան գործունէութեան համար առհասարակ եւ մասնաւորապէս շեշտեց Սփիւռքում հայ ինքնութեան պահպանմանն ուղղուած ծրագրերի ու միջոցառումների կարեւորութիւնը: Հոգեւոր տէրն ասաց. «Դուք միշտ արթուն էք, Սփիւռքի կարիքները հոգալու համարէ: Կաթողիկոս պատրիարքը կարեւորեց յատկապէս Սփիւռքում կրթօճախների գոյութիւնն ու գործունէութիւնը եւ նշեց, որ առանց հայոց լեզուի ու դպրոցի անհնար է պահպանել հայկականութիւնը օտար միջավայրում:
Սփիւռքի նախարարը շնորհակալութիւն յայտնեց պատուարժան հիւրին այցելութեան եւ սերտ համագործակցութեան համար, բարձր գնահատեց Հայոց Կաթողիկէ Եկեղեցու արդիւնաւէտ գործունէութիւնը հայ մշակոյթի պահպանման ու զարգացման գործում եւ նշեց, որ կաթոլիկ հոգեւորականներն ամէնուրեք իրենց խօսքով ու գործով հայկական շունչ եւ ոգի են փոխանցում սփիւռքահայերին: Նախարարը նշեց, որ պատրիարքարանը կարող է օժանդակել` ընդլայնելու նախարարութեան հայրենաճանաչութեանը, մայրենիի ու ազգային ինքնութեան պահպանմանն ուղղուած ծրագրերին` սփիւռքահայ երիտասարդների առաւել աքթիւ մասնակցութիւնն ընդլայնելու գործում:
Կողմերն անդրադարձան 2015թ. Զմմառի վանքում կայանալիք գիտաժողովին, որտեղ ներկայացուելու են հետազօտութիւններ Վատիկանում, Միջին Արեւելքի երկրների, Ամերիկեան երկրների արխիւներում պահպանուած եւ Հայոց Ցեղասպանութեանն առնչուող նիւթերի վերաբերեալ: Քննարկուեցին գիտաժողովի կազմակերպման հետ կապուած հարցեր:
Անդրադարձ եղաւ նաեւ Ապրիլի 12-ին Վատիկանի Սուրբ Պետրոսի տաճարում Հռոմի Ֆրանցիսկոս Պապի` Հայոց Ցեղասպանութեան 100-րդ տարելիցին նուիրուած սուրբ պատարագ մատուցելուն առնչուող հարցերի:
