ՀՀ Նախագահ, ՀՀ զինուած ուժերու գերագոյն գլխաւոր հրամանատար Սերժ Սարգսեան, երէկ ՀՀ ՊՆ վարչական համալիրէն ներս մասնակցած է պաշտպանութեան նախարարին կից աշխատակիցներու եւ հայկական բանակի կազմաւորման 23-րդ տարեդարձին նուիրուած հանդիսաւոր նիստին: Այս մասին կը յայտնեն ՀՀ նախագահի մամուլի ծառայութենէն:
Մինչ զեկոյցներուն անցնիլը, նիստի մասնակիցները մէկ րոպէ լռութեամբ յարգած են Հայրենիքի սահմանները արիաբար պաշտպանելու ժամանակ զոհուած մերօրեայ հերոսներու եւ արցախեան ազատամարտի տարիներուն իրենց կեանքը զոհաբերած բոլոր զինծառայողներու եւ ազատամարտիկներու յիշատակը:
Աշխատակիցներու նիստին, որ նուիրուած է 2014թ. ուսումնական տարուան մարտական եւ զօրահաւաքային պատրաստականութեան, մարտական հերթապահութեան, զօրքերու եւ շտապներու գործողութիւններու, մարտական պատրաստութեան արդիւնքներուն, զինուորական կարգապահութեան վիճակին, Նախագահ Սերժ Սարգսեան հանդէս եկած է բացման խօսքով:
Ան իր խօսքին յառաջաբանին մէջ մասնաւորապէս ըսած է.
«Պարոնա՛յք կեներալներ, սպաներ,
«Մինչեւ զեկոյցներին անցնելը, մի քանի խօսք եմ ուզում ասել:
«Ուզում եմ սկսել նրանից, որ տարուայ սկիզբը լարուած էր, եւ մենք ականատեսն ենք հակառակորդի բազմաթիւ նախայարձակ գործողութիւնների: Ունեցանք ցաւալի կորուստներ, որոնց համար սգում ենք` ընկած բոլոր տղերքի ընտանիքների եւ հարազատների հետ միասին: Կարծում եմ` որեւէ մէկը չի կասկածում, որ տղերքից իւրաքանչիւրի կեանքի համար ազրպէյճանցիները թանկ են վճարելու. նրանք թանկ են վճարել, այսօր թանկ են վճարում եւ ապագայում այդպէս էլ լինելու է»:
