Երեքշաբթի, 21. 05. 2024

spot_img

«Կայ Վարկած, որ Փերմեաքովը Առանձին Չէ Գործած». Յունան Պօղոսեան

Նախաքննութիւնը կը դիտարկէ վարկած, որ Գիւմրիի մէջ Աւետիսեաններու սպանութեան մէջ մեղադրուող` ռուսական 102-րդ ռազմակայանի ժամկետային զինծառայող Վալերի Փերմեաքովը միայնակ չէ գործած: Այս մասին ըստ «News.am»ի՝ Յունուար 26-ին լրագրողներու հետ զրոյցի ընթացքին ըսած է Հայաստանի ոստիկանութեան պետի առաջին տեղակալ, ոստիկանութեան գնդապետ Յունան Պօղոսեանը:

Փոխ ոստիկանապետը յայտնած է, որ նախաքննութեան ընթացքին առաջ կը բերուին տարբեր վարկածներ, որոնք կ՛ուսումնասիրուին եւ կամ կը հերքուին, կամ կը հաստատուին:

«Հայ ու ռուս իրաւապահները կ՛աշխատին եւ նախաքննութեան աւարտէն ետք ամէն ինչ պարզ կ՛ըլլայ», ըսած է ան:

Յունան Պօղոսեանը հերքած է նաեւ այն տեղեկութիւնները, թէ ռուսական ռազմակայանէն դէպքին օրը եւս 6 զինծառայող փախուստի դիմած է. «Դէպքի վայր ժամանելէն ետք ես հրաւիրած եմ ռազմակայանի պատասխանատուները, որոնք պարզաբանումներ տուած են մեզի»:

Յիշեցնենք. որ  Յունուար 12-ին Գիւմրիի մէջ սպաննուած գտնուած էին Աւետիսեաններու ընտանիքին վեց անդամները, իսկ ընտանիքի ամենակրտսեր անդամը` 6 ամսական Սերիոժա Աւետիսեանը, ծանր վիճակի մէջ տեղափոխուած էր հիւանդանոց, սակայն Յունուար 19-ին փոքրիկը նոյնպէս մահացած էր:

Սպանութեան գործով մեղադրեալը ռուսական ռազմակայանի ժամկետային զինծառայող Վալերի Փերմեաքովն է: Ռուսական կողմը քրէական գործ յարուցած է «դասալքութիւն» եւ «սպանութիւն» յօդուածներով: «Սպանութեան» գործ յարուցուած է նաեւ ՀՀ ՔԿ-ին կողմէ:

 

spot_img

ՆՄԱՆ ՆԻՒԹԵՐ

spot_img
spot_img

ՎԵՐՋԻՆ ՅԱՒԵԼՈՒՄՆԵՐ

spot_img

Զօրակցիր Զարթօնք Օրաթերթին