ՀՀ Նախագահ Սերժ Սարգսեան ցաւակցական ուղերձ մը յղած է փոքրիկն Սերոժա Աւետիսեանի մահուան առթիւ: Ուղերձին մէջ մասնաւորապէս կ’ըսուի. «Հակառակ տարուած բոլոր ճիգերուն հնարաւոր չեղաւ փրկել փոքրիկն Սերոժայի կեանքը: Հանգեցաւ այն լոյսը, որ դարձած էր մեր սփոփանքը Կիւմրիի մէջ գործուած ծանր ոճրագործութիւնէն ետք»: Նախագահ Սարգսեան այս առթիւ իր խորազգաց ցաւակցութիւնները յայտնեց Սերոժայի հարազատներուն, կիւմրեցիներուն եւ համայն հայութեան: Նախագահը վստահեցուց, որ հարկ եղած բոլոր գործընթացները կ’իրականացուին՝ այս ծանր ոճրագործութեան հատուցման համար:
Նշենք, թէ աւելի կանուխ ՀՀ Առողջապահութեան նախարարութիւնը փոխանցեց Սերոժա Աւետիսեանի մահուան լուրը: Յայտնենք, որ վերջին ժամերուն Սերոժայի վիճակը կտրուկ ծանրացած էր: Երեխան, որ փրկուած էր Կիւմրիի մէջ կատարուած սպանդէն կը գտնուէր հայ եւ ռուս մասնագէտ բժիշկներու խնամքին ներքոյ:
ՓՈՒԹԻՆ ԿԸ ՑԱՒԱԿՑԻ ԵՒ ՊԱՏՐԱՍՏԱԿԱՄՈՒԹԻՒՆ ԿԸ ՅԱՅՏԷ
Ռուսիոյ նախագահի պաշտօնական կայքին փոխանցումով, հեռաձայնային հաղորդակցութիւն մը տեղի ունեցած է Ռուսիոյ նախագահ Վլատիմիր Փութինի եւ Հայաստանի նախագահ Սերժ Սարգսեանի միջեւ: Ռուսիոյ նախագահը ցաւակցութիւն յայտնած է զոհուածներու հարազատներուն, ինչպէս նաեւ ամբողջ հայ ազգին`Կիւմրիի մէջ 12 Յունուարին տեղի ունեցած ողբերգութեան առնչութեամբ, ըսուած է հաղորդագրութեան մէջ: Ըստ նոյն աղբիւրին, նախագահ Փութին վստահութիւն յայտնած է, որ բոլոր անհրաժեշտ քննչական գործողութիւնները պիտի կատարուին ամէնէն կարճ ժամանակամիջոցներուն մէջ, եւ մեղաւորները պիտի կրեն օրէնսդրութեամբ նախատեսուած պատիժը: Միւս կողմէ ըստ Հայաստանի նախագահի մամլոյ ծառայութեան տարածած հաղորդագրութեան, նախագահ Սերժ Սարգսեան ընդգծած է, որ Հայաստանի Հանրապետութեան իրաւապահ մարմինները պիտի շարունակեն դէպքին բոլոր հանգամանքներուն լիարժէք բացայայտման ուղղուած անհրաժեշտ գործողութիւնները: Բացի ատկէ, նախագահները քննարկած են երկկողմանի յարաբերութիւններուն վերաբերող ընթացիկհարցեր: Ռուսիոյ լրատուամիջոցներուն փոխանցումով` հեռաձայնային հաղորդակցութիւնը տեղի ունեցած է նախագահ Փութինի նախաձեռնութեամբ:
Մինչ այդ Կիւմրիի սպանդին մէջ մեղադրուած Վալէրի Բէրմիաքով հարցաքննութեան ենթարկուելու պահուն, ընդունած է իր հանդէպ առկայ մեղադրանքը: Բէրմիաքով նաեւ ըսած է, թէ ինք այդ սպանդը կատարեց, որպէսզի Վլատմիր Յովհաննիսեանին հանդէպ իր ունեցած վրէժը լուծէ: Ըստ Բէրմիաքովի հերիւրանքներուն, Յովհաննիսեան մարդասպան մըն է, որ ռուսական՝ յատկապէս Իվանովու եւ Մարինա Ռոշչա քաղաքներուն մէջ մի քանի ոճրագործութիւն կատարած է:
