Global Arts Int-ը բարեգործական համերգ կը կազմակերպէ Փասատինայի մէջ, որմէ գոյացած ողջ հասոյթը պիտի փոխանցուի Սուրիահայ բարեգործական հիմնադրամին: Այս մասին կը յայտնէ «NEWS.am»-ը:
Համագործակցելով SARF-ի` Սուրահայութեան բարեգործական հիմնադրամին հետ, Յունուար 25-ին «Փասատինա Սիթի քոլեճի» համերգասրահին մէջ, ազգագրական եւ ժողովրդական երգերու անզուգական կատարումներով հանդէս պիտի գան՝ հայ յայտնի եւ սիրուած երգիչ-երգչուհիներ ու շոու–պիզնըսի ներկայացուցիչներ Գոհար Յովհաննիսեանը, Վարդան Պատալեանը, Էրիկը, Միսթր Իքսը, Նորոն, Յարութ Յակոբեանը, Ռաֆայէլ Երանոսեանը, «Գէորգեան» պարային ակադեմիան եւ այլն: Երեկոյի հանդիսավարներն են Յակոբ Յակոբեանն ու Արփի Գաբրիէլեանը:
Global Arts Int-ի հիմնադիր Կարպիս Թիթիզեան կը նշէ, որ բոլորիս պարտքն է մեր ուշադրութիւնը սեւեռել՝ Սուրիոյ մէջ ապրող մեր հայրենակիցներու խնդիրներուն: Անոր խօսքով սա իսկապէս բացառիկ առիթ է հայկական, ազգային, ժողովրդական երգերու սիրահարներուն համար:
