ՀՀ վարչապետ Յովիկ Աբրահամեան մասնակցեցաւ «Արի Տուն» ծրագրի 2-րդ փուլի փակման հանդիսաւոր արարողութեան: Այս մասին կը հաղորդէ Սփիւռքի Նախարարութեան կայքէջը:
Յուլիսի 4-ին Ծաղկաձորի ,Արի տունե ճամբարում կայացաւ Սփիւռքի երիտասարդների հայրենաճանաչութեան «Արի տուն» ծրագրի 2-րդ փուլի փակման հանդիսաւոր արարողութիւնը:
Միջոցառմանը մասնակցեցին ՀՀ վարչապետ Յովիկ Աբրահամեանը, ՀՀ սփիւռքի նախարար Հրանոյշ Յակոբեանը, Կոտայքի մարզպետ Արամ Յարութիւնեանը, այլ պաշտօնատար անձինք:
Վարչապետ Յովիկ Աբրահամեանը ողջունեց ներկաներին, կարեւորեց ծրագրի դերը հայապահպանութեան գործում եւ վստահեցրեց, որ այն առաջիկայում առաւել կընդլայնուի եւ կը կատարելագործուի:
Արիտունցիները ողջունեցին հիւրերին, ներկայացրին իրենց տպաւորութիւնները, ծրագրի շրջանակներում իւրացրած ազգային երգն ու պարը, ասմունքը եւ ստացած գիտելիքները: Կատարումների, հայրենիքին ձօնուած բանաստեղծութիւնների միջոցով նրանք արտայայտեցին իրենց սէրն ու նուիրուածութիւնը Հայրենիքի, նրա մշակոյթի հանդէպ եւ վստահեցրին, որ դառնալու են հայապահպանութեան ու Հայրենիքի առաջընթացի երաշխաւոր-առաջամարտիկներ, ընդմիշտ պահելու են կապը նոր ընկերների, հիւրընկալ ընտանիքների հետ: Նրանց զգացողութիւնների խտացուած արտայայտութիւնը կարելի է համարել արիտունցիներից մէկի բանաստեղծութեան հետեւեալ տողը` «Քոյ սէրն եմ ես, իմ Հայաստան, որ ծնուել եմ օտար հողում»:
Ծրագրի այս փուլը Հայաստան-Արցախ-Սփիւռք եռամիասնութեան իւրօրինակ խորհուրդն ունէր իր մէջ. ,Արի տունըե հիւրընկալել էր նաեւ Արցախի ներկայացուցիչներին եւ երիտասարդութեան քաղաք հռչակուած Սիսիանի լաւագոյն աշակերտներին, պատանիների եւ աղջիկների Ռուսաստանից, Ուկրաինայից, Վրաստանից, ԱՄՆ-ից, Ֆրանսիայից, Շուէդիայից, Լատուիայից, Սիրիայից, Լիբանանից: Ծրագրի այս փուլին մասնակցում էր 185 պատանիներ եւ աղջիկներ:
Նրանք բոլորն իրենց կրծքին կրում էին Հայոց ցեղասպանութեան 100-րդ տարելիցի խորհրդանիշ անմոռուկը` հաւատ ներշնչելով, որ հայոց պահանջատիրութեան կրողներն են լինելու:
Հիւրընկալ ընտանիքների անունից ներկաներին ողջունեց իր օջախում երեք երեխայ հիւրընկալած բ.գ.թ., պրոֆէսոր Լաւրենտի Միրզոյեանը:
Իր ելոյթով ներկաներին հիացրեց Իմ Հայաստան ծրագրի մասնակից, Լիբանանի Հայ Բարեգործական Ընդհանուր Միութեան «Արին» պարախումբը:
Երեխաներին իրենց խօսքով ու հայրենասիրական երգերով ոգեւորեցին ՀՀ վաստակաւոր արտիստ Շուշան Պետրոսեանը եւ երգիչ Անդրեն:
Վերջում հրաժեշտի աւանդական խարոյկի շուրջ թնդաց հայոց աւանդական քոչարին, խարոյկ, որ խորհրդանշում է աշխարհացրիւ հայ պատանիների ու երիտասարդների հոգու ջերմութիւնը, որ նրանք ստանում են` մասնակցելով ,Արի տունե ծրագրին:
