14 ՄԱՐՏԻ ՈՒԺԵՐՈՒ ԸՆԴՀԱՆՈՒՐ ՔԱՐՏՈՒՂԱՐՈՒԹԻՒՆԸ
ԱՅՑԵԼԵՑ ԹԷՔԷԵԱՆ ԿԵԴՐՈՆ
Ուրբաթ 6 Յունիս 2014-ի կէսօրէ ետք Թէքէեան Կեդրոն այցելեցին՝ 14 Մարտի Ուժերու Ընդհանուր Քարտուղարութիւնը ներկայացնող պատուիրակութիւն մը, 14 Մարտը բաղկացնող կողմերու ներկայացուցիչներով: Պատուիրակութիւնը, զորս կը գլխաւորէր Տոքթ. Ֆարէս Սաէյտ, ընդունուեցաւ ՌԱԿ Լիբանանի Շրջանային Վարչութեան ներկայացուցիչներուն կողմէ, գլխաւորութեամբ ատենապետ՝ ընկ. Միքայէլ Վայէճեանին: Հանդիպումին ներկայ եղաւ նաեւ պետական նախկին երեսփոխան՝ ընկեր Յակոբ Գասարճեան:
Հանդիպման ընթացքին 14 Մարտի պատուիրակութիւնը նախ շնորհաւորեց ՌԱԿ Լիբանանի Շրջանային նորընտիր Վարչութիւնը, ապա կողմերու խօսակցութիւններուն գլխաւոր առանցքը դարձաւ Լիբանանի եւ շրջանի ներկայ կացութիւնը:
Տոքթ. Ֆարէս Սաէյտ բարձր գնահատեց լիբանանահայութիւնը ընդհանրապէս եւ մասնաւորաբար անդրադառնալով ՌԱԿ-ի հետ գործակցութեան, ան բարձր արժեւորեց զայն՝ ապագային աւելի եւս սեղմ եւ համադրուած աշխատանքի կոչ ուղելով: ՌԱԿ-ի կողմէ ընկեր Միքայէլ Վայէճեան շնորհակալութիւն յայտնելով այցելուներուն հաստատեց, թէ ՌԱԿ-ի սկզբունքներն ու գաղափարախօսութիւնը ամբողջութեամբ կը համընկնին՝ 14 Մարտի ուժերու քաղաքականութեան եւ գաղափարախօսութեան, հետեւաբար՝ ՌԱԿ-ը ինչպէս անցեալին, նաեւ այսօր անքակտելի մէկ մասնիկն է անոր ու պիտի մնայ այդպէս:
Իր կարգին ընկեր Գասարճեան շեշտը դրաւ լիբանանահայութեան ամբողջական մասնակցութեան կարեւորութեանը վրայլիբանանեան քաղաքական կեանքէն ներս: Ընկերային եւ քաղաքական համարկումի տեսակէտեն ելլելով եւ պատկանելիութեան առողջ մօտեցումով ան շեշտեց, թէ լիբանանահայը լիիրաւ լիբանանցի է՝ հայկական ծագումով:
Աւարտին Տոքթ. Ֆարէս Սաէյտ եւ ընկեր Միքայէլ Վայեճեան այս հանդիպումը ամփոփող միացեալ յայտարարութիւն մը կատարեցին:
ՄԱՄԼՈՅ ԴԻՒԱՆ
ՌԱԿ ԼԻԲԱՆԱՆԻ ՇՐՋԱՆԱՅԻՆ ՎԱՐՉՈՒԹԵԱՆ
