Հայաստանի առաջին Հանրապետութեան անկախութեան 97-ամեակի առիթով Մայիս 29-ին Շարժայի Ս. Գրիգոր Լուսաւորիչ եկեղեցւոյ մէջ տեղի  ունեցաւ պատարագ եւ Հայաստանի դրօշի օրհնութիւն: Այս մասին կը տեղեկացնէ Տուպայի եւ Հիւսիսային Էմիրութիւններու ազգային վարչութեան պաշտօնական էջը:

Արարողութիւնը  ընթացաւԱրաբական Միացեալ Էմիրութիւններու եւ Քաթարի կաթողիկոսական փոխանորդ Տ. Մեսրոպ Վրդ. Սարգիսեանի հանդիսապետութեամբ: Կաթողիկոսական փոխանորդ Հայր Սուրբը հանդէս եկաւ պատգամով:

Բացի այդ, Տուպայի եւ Հիւսիսային Էմիրութիւններու ազգային վարչութեան կազմակերպութեամբ Անկախութեան տօնին առիթով` Մայիս 28-ին Տուպայի JW Marriott-Deira  հիւրանոցին մէջ տեղի ունեցաւ համերգ լիբանանահայ երգիչ Սերոբ Յակոբեանի մասնակցութեամբ:

Կազմակերպութեամբ  Հ.Ե.Ը-Անդրանիկ Սեւանի  Գործադիր  Մարմինին,Ուրբաթ, 23 Մայիս 2015-ի երեկոյեան, Հ.Բ.Ը.Մ.-ի  Զապէլ  Մովսէսեան  կեդրոնին մէջ  տեղի ունեցաւ   ձեռարուեստի  աշխատանքներու  եզակի  ցուցահանդէսի մը  բացումը:

  Հ.Ե.Ը-ի  Կեդրոնական Վարչութեան անդամներու, միութենականներու, մտաւորական   եւ արուեստասէր ընտրանիի մը    ներկայութեան,  Հ.Ե.Ը-ի Կեդրոնական  Վարչութեան փոխատենապետ  Համբար Եսայեան  կատարեց ցուցահանդէսին պաշտօնական բացումը, հատելով  սրահին մուտքին   զետեղուած կարմիր  ժապաւէնը:

   Հ.Ե.Ը Անդրանիկ Սեւանի  Գործադիր Մարմինի  ատենադպիր   Օհան Չափրազեան բարի  գալուստ    մաղթեց ներկաներուն եւ  երախտագիտութեան  խօսք  ուղղեց   Հ.Ե.Ը-ի Կեդրոնական Վարչութեան, ինչպէս նաեւ սկաուտական շարժումի անդամներուն: Ան յայտնեց, թէ  ցուցահանդէսը կը ներկայացնէ   լիբանանահայ վեց արուեստագէտներու ՝  Մկրտիչ Թահուլաքեան, Վահրամ Աղազարեան, Շահէ   Յարութիւնեան, Լենա Մանուկեան- Տաքեսեան, Տիգրան Գալուստեան եւ Հրաչ  Գարամանուկեան աշխատանքը, որոնք սիրայօժարօրէն   ընդառաջած  են  սոյն խմբային ցուցահանդէսին մասնակցելու  Անդրանիկ Սեւանի  Գործադիր Մարմինի  հրաւէրը:

Կոկիկ  հիւրասիրութեան մը  ընթացքին, ներկաները    հետաքրքրութեամբ  ծանօթացան  փայտի, պրոնզի եւ   պղինձի վրայ  փորագրութիւններու, տարբեր եղանակներով պատրաստուած քանդակներու,պտուտակներով  կազմած նկարներու, հմտօրէն  մշակուած ձեռային աշխատանքներու,  իւղաներկով եւ տեսակաւոր քարերով համադրուած ստեղծագործութիւններու,  մանրանկարչական գործերու, սերամիքի  եւ  ջրաներկի    ինքնատիպ  պաստառներու:

Ցուցահանդէսը  շարունակուեցաւ՝ Շաբաթ,   յետմիջօրէի  ժամը   4–էն, մինչեւ երեկոյեան ժամը ՝  8-ը  եւ  Կիրակի, 24  Մայիս  2015-ի առաւօտեան ժամը 10-էն՝ 1, յետմիջօրէի ժամը՝   4-էն՝ 8, Հ.Բ.Ը.Մ.-ի  Զապէլ Մովսէսեան կեդրոնը,  երրորդ  յարկ, Սին էլ Ֆիլ, Հըրշ Թեպէթ:

Օգտուելով  այս պատեհութենէն, ճեպազրոյց մը  ունեցանք  ցուցահանդէսին մասնակցող  արուեստագէտներուն հետ:

Ծանօթ  ոսկերիչ,  տաղանդաւոր պղնձագործ  ՄԿՐՏԻՉ  ԹԱՀՈՒԼԱՔԵԱՆ մահացած   ըլլալով,  մեր հարցումներուն պատասխանեց անոր  դուստրը. « Մկրտիչ  Թահուլաքեանը արհեստով  ոսկերիչ էր, սակայն յատուկ  սէր  ունէր մետաղներու  հանդէպ: Յատկապէս  հմտացած էր  պղնձի  եւ ձուլուածքներու  վրայ աշխատանքներով:  Անոր  աշխատանքները եթէ  նշմարեցիք, մեծամասնութեամբ  դիմանկարներ են՝ ազգային եւ  միջազգային  դէմքեր:  Պղնձաթելերու եւ  պղնձափոշիի    օգնութեամբ  պատրաստած է այս  դիմանկարները:  Անոր վարպետութեան  դրսեւորումն է  այս ստեղծագործութիւններուն տրուած  գունաւորումը եւ ալիքաւորումը, առանց ներկերու  օգնութեան, ջերմութեան եւ թթուային  նիւթերու  միջոցով»:

ԼԵՆԱ  ՄԱՆՈՒԿԵԱՆ- ՏԱՔԵՍԵԱՆ .«   Ես յաճախած եմ  Աշրեֆիէի  Հայ Աւետարանական  Կեդրոնական  Բարձրագոյն վարժարանը: Աւետարանական  դաստիարակութիւնը  մեծ ազդեցութիւն  գործած  է  վրաս:   Ստեղծագործութիւններուս  մեծամասնութեան խորքը,  կրօնքի եւ հաւատքի  հանդէպ  մարդ արարածին  արտայայտութիւնն  է:  Խաչը տարբեր խորհուրդներ  կը պարունակէ   ինծի համար: Խաչի  հանդէպ հաւատքը լայն  հորիզոններ  կրնայ բանալ   ենթակային առջեւ:  Կեանքի որեւէ մէկ պահուն, նեղութիւն կամ՝ ուրախութիւն,  խաչին նայելով եւ  աղօթելով,  վստահ եղէք  Ձեր առջեւ պիտի բացուի  լոյս,  լայն  հորիզոն, կանանչ ճանապարհ..:  Խաչին ապաւինելով եւ անոր փրկարար խորհուրդին հաւատալով  պիտի ստանաք  հոգեկան բաւարարութիւն:

Այս՝ արդէն  հինգերորդ հաւաքական ցուցահանդէսն է, որուն  կը մասնակցիմ:  Տարբեր  փորձառութիւններ  ձեռք  բերած եմ այդ  ժամանակամիջոցին:

ՀՐԱՉ  ԳԱՐԱՄԱՆՈՒԿԵԱՆ .« Գծագրութիւնը  սիրած  եմ  շատ վաղուց՝  նախակրթարան  յաճախած տարիներուն :  Շրջան մը ծաղրանկարներով  դրսեւորած եմ  գծագրութեան հանդէպ սէրս: Աւելի ուշ՝  տարբեր  ներկանիւթերով  կտաւներ  ստեղծագործած եմ: Այս՝ որ կը  տեսնէք  ընդամէնը  մէկ  տարուան   փորձառութեան արդիւնք է:  Մօրս  մահէն ետք,  ձեռագործներու  տոպրակ մը  յայտնաբերեցի  անոր անմիջական իրերուն  մէջ: Այս  ձեռագործները որ կը տեսնէք, ամբողջութեամբ մօրս  կը պատկանին:  Որոշեցի զանոնք   ներդաշնակել   հայկական մանրանկարչութեան   հետ:  Ահաւասիկ այդ  համադրութեան արդիւնքը:

 Յաճախած եմ Հ.Բ.Ը.Մ.-ի Լեւոն Կ. Նազարեան վարժարանը,ապա՝  Յովակիմեան-Մանուկեան մանչերու  երկրորդական վարժարան: Մասնագիտութիւնս կատարելագործած  եմ  Պէյրութի  Ամերիկեան համալսարանին մէջ:

    Հ.Բ.Ը.Մ.-ի  Յովակիմեան- Մանուկեան երկրորդական  վարժարանը  յաճախած  տարիներուն  շահած եմ  «Ֆապրիանօ»ի բազմաթիւ  մրցանականներ:   Ըսեմ նաեւ, որ միայն  ազատ  ժամանակներուս  կը զբաղիմ  գծագրութեամբ: Արհեստավարժ մը  չեմ  եւ  կը մնամ սիրողական   նկարիչի մը   սահմաններուն մէջ:

ՏԻԳՐԱՆ  ԳԱԼՈՒՍՏԵԱՆ.« Այս  ցուցահանդէսին առիթով  կը փափաքիմ շնորհակալութիւն յայտնել արուեստի այբուբենը ինծի  ծանօթացուցած  եւ  ընտելացուցած,   տաղանդաւոր ուսուցիչ  պարոն Վազգէն Թիւթիւնճեանին:  Իբրեւ  ուսուցիչ եւ անձնաւորութիւն, ան   մեծ ներգործութիւն   ունեցած է մեր սերունդին  հոգեմշակութային գիտակցութեան զարգացման  վրայ:  Անոր  շինիչ թելադրութիւնները մեզի մղած է դառնալու  պարտաճանաչ  մարդ  եւ հայ:  Պարոն  Վազգէն Թիւթիւնճեանը  զիս  յորդորեց  ընտրելու  ճարտարագիտութեան ասպարէզը, որուն համար մեկնեցայ  Հայաստան: Այնտեղ,  ճարտարագիտութեան գաղտնիքներուն   տիրապետելու  զուգահեռ, Կանազի  մշակութային  պալատին մէջ  հետեւեցայ  քանդակագործութեան:  Եօթ տարի   շարունակ  այդ դասընթացքներուն  հետեւելէ ետք, վկայուեցայ  իբրեւ  ժողովրդական  քանդակագործ: Միաժամանակ   շրջանաւարտ դարձայ  Երեւանի  Կարլ Մարքսի անուան  փոլիթեխնիքական  ինստիտուտի  ճարտարագիտական   ֆակուլթեթէն:  Ուսանողական  տարիներուն ծանօթացայ   տաղանդաւոր  քանդակագործ Շաւարշ  Վաղարշակեանին,  խաչքարի  փորագրութեան վարպետ Կարպիս Թաշճեանին: Պարոն Կարպիսը  ինծի նաեւ  ծանօթացուց տուֆ   քարի վրայ  քանդակագործութեան  գաղտնիքները: Կերպով մը  մասնագիտութիւնս կատարելագործուեցաւ: Մէկ կողմէ՝  ճարտարագիտութիւն, միւս կողմէ՝   քանդակագործութիւն:

Արդէն  քառորդ դար եւ աւելի, վերադարձած եմ  Պէյրութ: Հիմնած  եմ անձնական գրասենեակս:  Ստեղծած  եմ  զանազան  յուշարձաններ, շէնքեր, համալիրներ: Իբրեւ լաւագոյններէն  եւ մանաւանդ առաջիններէն կրնամ  յիշատակել  Անթիլիասի մայրավանքի  շրջափակէն ներս  Եղեռնի յուշարձանը, Սուրբ Ստեփանոս Մատուռը: Հայ  Կաթողիկէ  Մեսրոպեան  վարժարանին մէջ  Մեսրոպ Մաշտոցի յուշարձանը, ինչպէս նաեւ Արարատ Լեռը:  Զըմառի  կաթողիկոսական  գահը, Զըմառի Ապրիլեան յուշարձանը:

Այսօրուան ցուցահանդէսին  մէջ ներկայացուցած  եմ  մեր  ժողովուրդին  գոյապայքարը  խորհրդանշող  ստեղծագործութիւններ:  Ձեր առջեւը  անմիջականօրէն  կը   տեսնէք Մայր Հայաստանը՝  գրկած ապագայ Հայաստանը,  հայկական դրօշը:  Մայր Հայաստանը  իր հետ կը կրէ  Հայկական  Դատը,  իսկ  ոտքերուն  փաթթուած  օձը մեր  թշնամին է:  Ահաւասիկ տարբեր  ոճի   եւ խորհուրդի  արձաններ, խաչքարեր  տուֆի վրայ, փայտի վրայ,թաւիշի վրայ:  Ձեր բոլոր  տեսածները  կերպով մը   իմ  բարոյական պարտքն է, այն  բոլոր  անձնաւորութիւններուն  որոնք մեզի  ջամբեցին  գիտութիւն:  Չեմ ուզեր մոռնալ նաեւ  ծնողներս, տիկինս, որոնք   մեծ  ներդրում ունեցած են  բոլոր յաջողութիւններուս մէջ:

 ՎԱՀՐԱՄ ԱՂԱԶԱՐԵԱՆ.« Մենք պտուտականերու  մեծաքանակ  վաճառքով կը զբաղինք:  Օր մը, պատահականօրէն  սեղանին  վրայ պտուտակներ շարեցի, անոնց համաչափութիւնը եւ  ներդաշնակութիւնը  բան մը արթնցուց  մէջս: Հետաքրքրութիւնս աճեցաւ,սկսայ      պտուտակներով  նկարներ կազմել: Կարճ  ժամանակ  ետք,փորձեցի  տախտակի վրայ ամրացնել զանոնք  եւ որոշ  զարդեր կազմել այդ պտուտակներով:

Ժամանակի  ընթացքին   փորձառութիւն ձեռք բերելով, աւելի  մեծ եւ լուրջ  կտորներ սկսայ կազմել տարբեր  տրամաչափի պտուտակներով:  Այսօր, ինչպէս կը  նկատէք, գրեթէ  ամէն բան կրնամ աշխատիլ կամ գծել պտուտակներու  օգնութեամբ:  Աշխատանքներուս  մեծամասնութիւնը ունին  հայկական  շունչ: Բնաւ   չեմ  մոռցած   հայկական  խաչքարը:

Երեք առիթներով անհատական  ցուցահանդէս  կազմակերպած եմ  Լիբանանի եւ  արտասահմանի մէջ:  Մասնակցած  եմ  եօթ հաւաքական ցուցահանդէսներու:

ՇԱՀԷ  ՅԱՐՈՒԹԻՒՆԵԱՆ՝  Երեւանի,   Թերլեմեզեանի անուան Գեղեցիկ Արուեստից   պետական  գոլէճէն վկայեալ, ապա՝ Երեւանի  Գեղեցիկ Արուեստից  ակադեմիայէն  վկայեալ:  Սերամիքի  վրայ արհեստագիտութեան  հմուտ մասնագէտ մը:  Անոր ստեղծագործութիւնները կ’ընդգրկեն  մայրենի բնութիւնը,   հայկական եկեղեցիներ: Շահէ Յարութիւնեան անհատական երեք ցուցահանդէս կազմակերպած է  Պէյրութի մէջ: Մասնակցած է նաեւ հաւաքական  ցուցահանդէսներու:

Յունիս 2-ին Եագուդսքի մէջ պիտի բացուի Հայկական մշակութային կեդրոնի շէնքը: Ըստ «Երկրամաս» պարբերականի՝ այս օրերուն այնտեղ կ՝ըթանան ներքին յարդարման վերջին աշխատանքները:

Կեդրոնի բացման արարողութեան Հայաստանէն պիտի մասնակցի պաշտօնական պատուիրակութիւն` Ազգային ժողովի փոխնախագահ Հերմինէ Նաղտալեանի գլխաւորութեամբ:

Տեղի հայ համայնքի նախագահ Անդրանիկ Նաւոյեանի խօսքով, մշակութային կեդրոնի հիմնական խնդիրներէն մէկը կրթութիւնն է: Այստեղ պիտի ուսուցանեն հայերէն, ռուսերէն եւ եագուդերէն: Ընդհանուր առմամբ, Հայկական մշակութային կեդրոնը պիտի ունենայ 12 աշխատող: Բացման արարողութեան ժամանակ կեդրոնին մէջ պիտի կայանայ մեծ համերգ` հայկական, եագուդական եւ ռուսական մշակութային խումբերու մասնակցութեամբ:

Նշենք, որ մշակութային կեդրոնը կառուցուած է վերջերս բացուած Հայ առաքելական Սուրբ Կարապետ եկեղեցւոյ մօտակայքը:

Հ.Բ.Ը.Միութեան «Խօսնակ» պաշտօնաթերթի խմբագրութեան եւ անոր կից գործող Մշակութային Յանձնախումբի կազմակերպութեամբ, եւ հովանաւորութեամբ՝ Հայոց Ցեղասպանութեան Լիբանանի Կեդրոնական Մարմնի, Ուրբաթ, 22 մայիս 2015 -ին, կէսօրէ առաջ ժամը 11.00-ին, մասնակցութեամբ՝ Լիբանանահայ 12 նախակրթարաններու Ե.եւ Զ. կարգերու աշակերտութեանց, տեղի ունեցաւ «Արտասանութեան եւ Նկարչութեան» հետաքրքրական մրցում մը, Հ.Բ.Ը.Մ. – Հ.Ե.Ը.-ի Ահրամճեան Կեդրոնէն ներս:

Այս տարուայ «Արտասանական եւ Նկարչական» զոյգ մրցումները նուիրուած էին Ցեղասպանութեան 100-ամեակին, որուն մասնակցեցան «Հ. եւ Մ. Արսլանեան Ճեմարան»ի,  Ազգային «Ռուբինեան» վրժ.ի, «Ազգ. Աքսոր Գասարճեան» վրժ.ի,  Ազգային «Աբգարեան» վրժ.ի,  Հայ Կաթողիկէ «Սրբուհի Ակնէս» վրժ.ի, «Հայ Աւետարանական «Գոլէճ»ի,  Հայ Աւետարանական «Կեդրոնական Բարձրագոյն» Հայ Աւետարանական «Թորոսեան» վրժ.ի, Հայ Աւետր. Շամլեան-Թաթիկեան վրժ.ի, Հայ Կաթողիկէ «Հռիփսիմեանց» վրժ.ի, Հ.Բ.Ը.Միութեան «Լ.Կ.Նազարեան» եւ « Պ.Կարմիրեան» վարժարաններու 72 աշակերտ-աշակերտուհիներ:

 Ուրախութիւն էր, որ այտարարուած ժամէն առաջ, Ահրամճեան Կեդրոնի սրահը, լեցուած էր արդէն մրցման մասնակիցներով, ինչպէս նաեւ իրենց ընկերները քաջալերել փափաքող սան-սանուհիներով, որոնք գարնանային զուարթ առաւօտով, երամ-երամ, հաճելի տրամադրութեան մէջ եկած էին, իրենց համբերատար ու նուիրեալ ուսուցիչ-ուսուցչուհիներուն առաջնորդութեամբ:

Բոլորի դէմքերուն վրայ կար գոհունակութեան ժպիտ ու ուրախութեան արտայայտութիւն: Անոնք խանդավառ էին ու անհամբեր,  ու բոլորն ալ կը սպասէին լսելու մրցակիցներու արտասանութիւնները: Սակայն, այս միջոցառման մէջ կար տարբեր գեղեցիկ պատկեր մը. գաղութիս 12 հայկական նախակրթարաններէն բազմատասնեակ ուսանողներ հաւաքուած էին ի մի, եւ անոնք ժրաջան մեղուներու նման կը խօսէին իրարու հետ, կը կատակէին եւ կը ջանային ծանօթութիւն հաստատել իրարու հետ..: Ահա՛ նաեւ «Խօսնակ»ի նախաձեռնութեան նպատակը՝ ծանօթութիւն, բարեկամութիւն եւ գործակցութիւն միաժամանակ:

«Արտասանական Մրցման» համար կազմուած էր «Գնահատիչ Յանձնախումբ» մը, որ կը բաղկանար գաղութիս ծանօթ դերասան-ասմունքողներ՝ Արփի Աւետիքեանէ , Արփի Քարամանլեանէ եւ վաստակաւոր ուսուցիչ Օհան Պոտրումեանէ : Իսկ «Նկարչական մրցման» համար կազմուած «Գնահատիչ Յանձնախումբը կը գլխաւորէր արուեստի վաստակաւոր ուսուցիչ եւ արուեստագէտ՝ Վազգէն Մուղալեան, ինչպէս նաեւ հայրենի ծանօթ արուեստագէտ՝ Հրազդան Թոքմաճեան:

Մրցում ցերեկոյթը սկսաւ պաշտօնաթերթի խմբագրական կազմի անդամ Տիկին Անժէլ Միսիսեանի բացման խօսքով: Ան ողջունելով մեր նորահաս սերունդի պատանի ներկայացուցիչները, շեշտեց կարեւորութիւնը նման հանդիպումներու ու միջոցառումներու, որպէսզի փառաբանենք մեր մայրենի լեզուն եւ զայն հնչեցնենք ամէն ժամ: Տիկին Միսիսեան կարեւորեց նման հանդիպումները եւ փափաք յայտնեց որ անոնք շարունակուին ամէն տարի եւ յարատեւեն ապագային ալ՝  ի շահ մեր մշակոյթին, ուր այսօրուայ փոքրիկ արտասանողներն ու նկարողները վստահաբար վաղը, հետապնդուող հոգատարութեան ու խնամքի տակ պիտի դառնան հռչակաւոր ասմունքողներ ու գեղանկարիչներ:

Տիկին Անժէլ Միսիսեանի բացման խօսքէն ետք, հերթականութեամբ սկսան արտասանել մասնակցող վարժարաններու Ե. կարգի ուսանողները: Այս տարի Յանձնախումբը փափաքած էր «պարտադիր արտասանութիւն» դրութիւնը ջնջել եւ արդարեւ աշակերտներ արտասանեցին իրենց նախընտրած ազատ քերթուածները: Ե. կարգի աշակերտներու ելոյթներէն ետք, հանդէս եկան Զ. կարգի ուսանողներ:

Հոս, անվարանօրէն կ’ուզենք ըսել, որ մասնակից  33  աշակերտ-աշակերտուհիներ, բոլորն ալ համարձակութեամբ, գիտակցութեամբ ու խոր ապրումով կատարեցին իրենց մեկնաբանութիւնները, ներկաներուն ներշնչելով  հայաբոյր գինարբուք, արժանանալով թէ «Ժիւրի»ի անդամներուն  եւ թէ ներկայ աշակերտներու գնահատանքին ու բուռն ծափահարութեանց:

Այս առթիւ պիտի ըսենք, որ նշմարելի էր բոլոր վարժարաններէ ներս տարուած բացառիկ հոգատարութիւնը՝ երեւոյթ մը, որ զգալի դարձաւ կատարուած «Արտասանական ու Նկարչական» մրցումներու ժամանակ:

Իսկ երբ Բ. յարկի սրահէն ներս տեղի կ’ունենար քերթողութեան յաջող վազքը, վարը՝ Ա. յարկի վրայ կը կատարուէր գծագրութեան մրցումը, ուր թէ Ե. կարգի եւ թէ Զ. կարգի ուսանողութեանց համար որոշուած էր յանպատրաստից  «Վերածնունդ» նիւթը: Իրապէս հետաքրքիր ու տպաւորիչ էր պարզուող տեսարանը: «Նկարչութեան մրցման» մասնակից  39 ուսանողներ, որպէս փոքրիկ գեղանկարիչներ, մեծ լրջութեամբ կը շարժէին իրենց փոքրիկ մատները՝ թուղթին յանձնելով իրենց երեւակայութեան արգասիքները, գունաւորելով իրենց նկարները..:

Եւ վերջապէս… երբ յաջողութեամբ աւարտեցան թէ՛ ասմունքները ու թէ՛ ալ գծագրութիւնները, ասոնց հետ դադրեցան ծափահարութիւնները ու պահը ստացաւ այլ  պատկեր եւ Տիկին Անժէլ Միսիսեանի փափաքին վրայ, կարգ մը աշակերտներ հանդէս եկան երգով, ու ծաղկեցուցին ցերեկոյթը: Հուսկ ապա, աշակերտներ հեւ ի հեւ սպասեցին զոյգ Գնահատիչ Յանձնախումբերու որոշումներուն՝ տեսնելու համար մրցումներուն արդիւնքները:

Արդիւնքներու յայտարարութեան լոյսին տակ, «Խօսնակ»ի խմբագիր Համբիկ Մարտիրոսեան նախ իր շնորհակալութիւնը յայտնեց մասնակից վարժարաններու տնօրէնութեանց, այդ վարժարաններու հայերէն լեզուի եւ արուեստի ուսուցիչներուն, գնահատելով անոնց ազգանուէր ու կրթանուէր առաքելութիւնն ու գործակցութիւնը, եւ ապա ան  շնորհակալութիւն յայտնեց «Ժիւրի»ի անդամներուն, իրենց անկողմնակալ գնահատանքին համար: Ան մասնաւոր շնորհակալութիւն յայտնեց  «Տէմքօ» հաստատութեան  եւ Ռաֆի Միքայէլեանին,  որոնք գնահատելով հայ գիրն ու մշակոյթը, տրամադրած էին օրուայ  նուէրները: Ան շնորհաւորեց նաեւ բոլոր մասնակիցները, յայտարարելով, թէ այսօր «յաղթող ու յաղթուող չկայ, այլ՝ բոլոր մասնակիցներն ալ յաղթանակած են…  քանի որ ներկայ եւ ասոր նման բոլոր միջոցառումներ նետուած ձեռնոցներ են մեր ոսոխի դէմքին, որովհետեւ, ան, արիւնարբու գազանը 100 տարիներ առաջ կ’ուզէր աշխարհի երեսէն ջնջել հայն ու հայուն անունը, իսկ մենք այսօր կա՛նք ու կը շարունակենք մեր պահանջատիրութեան երթը, որուն դրօշակակիրները դո՛ւք էք, սիրելի աշակերտներ»:

Ապա Համբիկ Մարտիրոսեան շնորհաւորեց թէ՛ Արտասանական եւ թէ Նկարչական մրցման լաւագոյնները եւ անոնց բաժնուեցան արժէքաւոր պարգեւներ՝ Ժիւրիի անդամներու ձեռամբ:

Ըստ «Գնահատիչ Յանձնախումբ»ի որոշման, «Արտասանական մրցման»  բացառիկ նուէր մը տրուեցաւ Ռիթա Գասպարեանին՝ իր գեղեցիկ ասմունքին եւ դերասանական շնորհքին համար: Իսկ Ե. կարգի Առաջին պարգեւի արժանացան՝ Հրակ Լախեան(Ճեմարան.) եւ Համբիկ Մարտիրոսեան ( Հ.Բ.Ը.Մ. Նազարեան վրժ.), Երկրորդ հանդիսացան՝ Սեւան Հայրապետեան (Ազգ. Աբգարեան վրժ.), եւ Ժոէլ Տէմիրճեան (Հռիփսիմեանց վրժ.): Երրորդ հանդիսացան՝ Սերլի Մանուկեան(Թորոսեան վրժ.) եւ Արամ Հանտեան (Ճեմարան): Իսկ Խրախուսանքի մրցանակին  արժանացան Հերմինէ Աբրահամեան (Աբգարեան վրժ.) եւ Էլվիրա Զէյթունցեան (Հայ Աւետարանական Քոլէճ):

Զ.կարգի Առաջին հանդիսացան՝ Սարին Զարմէնեան(Ճեմարան) եւ Սելինա Աբիկեան (Հռիփսիմեանց): Երկրորդ հանդիսացան՝ Պետրոս Աթիքեան (Ազգ. Ռուբինեան վրժ.) եւ Գառնի Քէօշկէրեան (Հայ Աւետրն Քոլէճ.): Երրորդ հանդիսացան՝ Բալիկ Թէքէլեան (Ազգ. Աբգարեան վրժ.)  եւ Նաթալի Մարգարեան (Ազգ. Աքսոր  Գասարճեան Վրժ.): Իսկ Խրախուսանքի մրցանակը ստացան ՝ Կարօ Կիրիթլեան ( Հ.Բ.Ը.Մ. Կարմիրեան վրժ.) եւ Սիլվիա Տէմիրճեան (Ճեմարան):

Գալով «Նկարչական մրցման», Ե.կարգի Առաջին հանդիսացաւ Աբիկ Արփաճեան (Հ.եւ Մ. Արսլանեան Ճեմարան), Երկրորդ հանդիսացաւ՝  Փաթիլ Զարմէնեան  (Ճեմարան),  Երրորդ հանդիսացաւ Զեփիւռ Գէորգեան (Շամլեան-Թաթիկեան), իսկ Խրախուսանքի մրցանակի արժանացաւ Սէրլի Եթիմեան (Հայ Աւետ. Կեդր. Բարձր. վարժ.):

Նկարչական Մրցման Զ.կարգի Առաջին հանդիսացաւԼոռի Պէրպէրեան ( Ճեմարան), Երկրորդ հանդիսացաւ Եարա Եունէս(Հայ Աւտր. Քոլէճ), Երրորդ հանդիսացաւ Յակոբ Ջուլֆայեան(Հ.Բ.Ը.Մ. Կարմիրեան վրժ.): Իսկ խրախուսանքի մրցանակը ստացաւ Յարութ Ղազարեան  ( Ճեմարան):

Եզրակացնելով պիտի ըսենք, որ «Խօսնակ» պաշտօնաթերթի խմբագրութիւնը, գնահատելով մասնակցող բոլոր աշակերտները, իւրաքանչիւրին տրամադրեց արժէքաւոր յիշատակի նուէր ու գիրք: Սպասուած հայաբոյր հանդիպումը վերջացաւ խանդավառ տրամադրութեան մէջ, որ վստահաբար իր լաւ տպաւորութիւնը  պիտի ձգէ նորահաս սերունդի մօտ, եւ անոնք ապահովաբար աւելի ու աւելի պիտի սիրեն Մեծն Մաշտոցը, հայերէն լեզուն ու կիրքով փարին մեր ոսկեղնիկին եւ պաշտպանեն զայն ի գին ամէն զոհողութեան:

                                                                                                                       «ԽՕՍՆԱԿ» ԼՐԱՏՈՒ

Մայիս 9-ին հայ ուսանողները մասնակցեցան Փեքինի լեզուի եւ մշակոյթի համալսարանի կազմակերպած 12-րդ մշակութային փառատօնին: Մեր ուսանողները ձեռնարկին ընթացքին  ներկայացուցին  Հայաստանի վերաբերեալ հետաքրքիր պատմութիւններ: Այս մասին «Հայերն այսօր»-ին կը յայտնեն Չինաստանի հայ համայնքէն:

Հայկական տաղաւարը մեծ հետաքրքրութիւն յառաջացուցած էր չինացի եւ արտասահմանցի ուսանողներուն մօտ: Ճաշակելով հայ ուսանողներու պատրաստած համեղ ուտեստները` անոնք կը ծանօթանային  հայկական աւանդական խոհանոցին, արուեստին ու մշակոյթին:

Հայ ուսանողները եւս մէկ անգամ յաջողեցան Հայաստան ներկայացնել վառ գոյներով, որուն լաւագոյն ապացոյցն էր բազմաթիւ հիւրերու ներկայութիւնը տաղաւարին մէջ եւ  հետաքրքրուածութիւնը Հայաստանով:

Հայ կաթողիկէ Մեսրոպեան բարձրագոյն վարժարանի ճատրակի հաւաքականը պատուաբեր էջ մը եւս աւելցուց վարժարանի մարզական նուաճումներու մատեանին մէջ, երբ Կիակի, 3 Մայիս 2015-ին երրորդ հանդիսացաւ Լիբանանի դպրոցներու ճատրակի ախոյեանութեան մրցումներուն: Մրցումները կազմակերպուած էին Լիբանանի ճատրակի ֆետերասիոնին կողմէ. կը մասնակցէին լիբանանեան 26 վարժարաններու հաւաքականները:

Մեր վարժարանի աշակերտական խումբին անդամները՝ Նանօր Առնէլեան, Կի Գալուստ, Ճիօ Գալուստ, Ժանտարք Տաւուլպէօքեան, Յակոբ Թերզեան եւ Կարօ Գալֆայեան ցուցաբերեցին վարպետ եւ հնարամիտ խաղ: Անոնց յաջողութեան մէջ մեծ էր դերը ճատրակի ուսուցիչ պրն. Էլի Հուլիշեանին, որ տարիներէ ի վեր կը հետեւի պատանի խաղցողներու պատրաստութեան եւ յառաջդիմութեան:

Այս առիթով, Մեսրոպեանի տնօրէնութիւնը շնորհաւորեց պրոնզէ բաժակակիր աշակերտներն ու անոնց ծնողները, գնահատեց ինչպէս վերջիններուն, նոյնպէս եւ պատասխանատու ուսուցիչին ջանքերը՝ պատանիներու մտաւոր ընդունակութիւնները զարգացնող այս մարզաձեւին շնորհուած ուշադրութեան համար:

 ՏԵՂԵԿԱՏՈՒԱԿԱՆ ԳՐԱՍԵՆԵԱԿ
ՀԱՅ ԿԱԹՈՂԻԿԷ ՄԵՍՐՈՊԵԱՆ ԲԱՐՁՐԱԳՈՅՆ ՎԱՐԺԱՐԱՆԻ

Նկատի ունենալով որ իւրաքանչիւր աշակերտի բնածին կարողութիւնները առաջնորդելը մեր մեծագոյն նպատակն է, վարժարանիս ուսուցչակազմին, ի մասնաւորի գծագրութեան եւ ձեռային աշխատանքի ուսուցչուհիներուն առաջնորդութեամբ, Երկուշաբթի 18 Մայիսին, վարժարանիս  Յակոբ  Պարսամեան   սրահը համախմբուած էինք, միասնաբար ըմբոշխնելու Մանկապարտէզէն մինչեւ Միջն. Գ. դասարաններու աշակերտներուն ստեղծագործութիւնները: Տիկ. Ռիթա Թամուկեան փոխանցեց վարժարանիս տնօրէնուհի՝ Տիկ. Կալինա Նաճարեանի խօսքը, անդրադառնալով թէ չորրորդ տարին ըլլալով կը ներկայանանք նման ցուցահանդէսով մը, սակայն այս տարի տարբեր եռանգով, որովհետեւ կը զուգադիպի Հայոց Ցեղասպանութեան 100 Ամեակին: Հետեւաբար, յատուկ անկիւն մը տրամադրուած էր սոյն նպատակին համար: Իր խօսքին մէջ տնօրէնուհին անդրադարձած էր, թէ գծագրութեան ու ձեռային աշխատանքի հետեւող աշակերտներուն մօտ դաս սորվելու կարողութիւնը աւելի զօրաւոր կը դառնայ: Վերջապէս ան շնորհակալութիւն յայտնած էր բոլոր ուսուցիչներուն:

         Իսկ Ուրբաթ 22 Մայիսին, աշակերտները խանդավառ եկած էին դպրոց, որովհետեւ  միայն երեք դասապահ ունենալէ ետք պիտի բարձրանային սրահ ըմբոշխնելու համար «Samaritan’s Purse»ի կողմէ ներկայացուելիք կրօնաբարոյական զուարճալի թատերգութիւնը: ներկայացումին աւարտին աշակերտ ստացաւ տուփ մը լեցուն նուէրներով: Սոյն առիթը ընծայուած էր մեզի նախաձեռնութեամբ հոգաբարձութեան նախկին անդամ՝ Ընկ. Վահէ Արթինեանի: Ապա,  աշակերտները իջան բակ, ուր տեղի ունեցաւ մարմնամարզական խաղեր: Թէքէեան խումբը խլեց խաղերուն առաջնութիւնը, իսկ «Basket Ball Match»ը վերջ գտաւ Վահան խումբի յաղթանակով: Իւրաքանչիւր յաղթանակ արձանագրող աշակերտ ստացաւ նուէր մը:

         2014 – 2015 տարեշրջանի ատենամարզանքի պահերը  իրենց աւարտին հասան «Վերջին  Զանգ»ով, որ Հայաստանի մէջ ծնունդ առած սովորութիւն մըն է: Յայտագիրը սկսաւ Միջն. Գ. դասարանի աշակերտներուն սրտայոյզ  խօսքերով, որմէ ետք Ծաղիկ դասարանի աշակերտները ներկայացան «Մնաք Բարով Իմ Դպրոց» արտասանութեամբ եւ «Վերջին Զանգ» երգով: Ապա Նախ. Զ. եւ Միջն. Ա.,Բ. եւ Գ. դասարաններու աշակերտները ներկայացան «Վերջին Զանգ» գեղեցիկ պարով,պարուսոյց Տիկ. Արազ Ագըլեանի առաջնորդութեամբ: Բեմահարթակ բարձրանալով  Ծաղիկ դասարանի աշակերտները Միջն. Գ. դասարանի աշակերտներուն նուիրեցին մէկական ձեռային անմոռուկ եւ զանգակ, փոխարէնը ստանալով մէկական կարմիր ծաղիկ: Վերջապէս Միջն. Գ. դասարանի աշակերտները ջահը փոխանցեցին Միջն. Բ. դասարանին, որմէ ետք յաջորդեց կարկանդակի հատումը:

       Վերջապէս տնօրէնուհին ի սրտի խօսքին մէջ անդրադարձաւ, որ մեր աշակերտները հրաժեշտ տալով իրենց վարժարանին պիտի անցնին կեանքի նոր հանգրուան, յուսալով որ բարձր պահեն վարժարանիս անունը: Իսկ որպէս ժառանգորդները Հայոց Ցեղասպանութեան 100 Ամեակի, տէր ու պաշտպան կանգնին մեր նուիրական սրբութիւններուն: Ան իր խօսքը եզրափակեց մաղթելով աշակերտներուն, թէ ինչ որ ստացան Թէքէեանի կրթական ու հայեցի դաստիարակութենէն աւելիով վերադարձնեն մարդկութեան ու հայ ազգին:

          Բեղուն տարեշրջան մը եւս բոլորեցինք: Նորանոր նուաճումներ աձանագրելու վճռակամութեամբ պիտի շարունակենք մեր գոյերթը: