Հայրենի վաստակաւոր ու սիրուած երգչուհի Նունէ Եսայեան Ուրբաթ իրիկուն հմայեց Կիպրոսի հայ համայնքը իր «Կանք, պիտի լինենք եւ դեռ շատանանք»հայրենասիրական համերգով: Այս մասին յայտնած է artsakank.com:

Հանդիսութիւնը կազմակերպուած էր Հայոց Ցեղասպանութեան 100-ամեակի Ոգեկոչման Կիպրոսի Յանձնախումբին եւ հովանաւորուած՝ ՀՀ Սփիւրքի նախարարութեան կողմէ, «Հրայր Յովնանեան» եւ «Փիւնիկ» Հիմնադրամներուն աջակցութեամբ:

Երեկոն բացուեցաւ Նիկոսիոյ Ս. Աստուածածին եկեղեցիի կրտսեր երգչախումբի երգերով, որմէ ետք Նունէ Եսայեան ամբողջ մէկուկէս ժամ բարձր խանդավառութեան մէջ պահեց հանդիսատեսները իր հայկական ընտրեալ երգացանկով: Սկսելով Կոմիտասով ու Սայաթ Նովայով, ան անցաւ ժողովրդական, ֆէտայական ու հայրենասիրական սիրուած ու պաշտուած երգերուն, վերջացնելով Հայաստանին ու հայոց բանակին նուիրուած երգերով, բուռն ծափահարութիւններ ու հիացմունքի արտայայտութիւններ խլելով ներկաներէն:

Ուրբաթ, 12 Յունիսի երեկոյեան կիպրահայութիւնը ապրեցաւ անմոռանալիայն քաղցր պահերէն մին, երբ եղբայրացած ու միակամ, ան զգաց հայրենի աշխարհի կարօտն ու ջերմութիւնը, շնորհիւ Նունէի հոյակապ այս համերգին:

Յաջորդ առաւօտ Նունէ Եսայեան եւ իր գործակիցները մեկնեցան Աթէնք, շարունակելու իրենց համերգային շրջագայութիւնը, որ 100-ամեակի միջոցառումներու ծիրէն ներս Սփիւռքի նախարարութեան գովելի ու գնահատելի նախաձեռնութիւններէն մէկն է:

Յունիս 13-ին Մարսէլի 4-րդ եւ 5-րդ շրջաններու ղեկավարութեան եւ Մարսէյլի հայ համայնքի միասնական ջանքերով, ինչպէս նաեւ Մարսէյլի մէջ ՀՀ գլխաւոր հիւպատոսութեան աջակցութեամբ «Սիթի-Պրահիմ» պուրակին մէջ տեղի ունեցաւ Հայոց ցեղասպանութեան զոհերու յիշատակը յաւերժացնող խաչքարի բացման արարողութիւն, որուն յաջորդեց օրհնութեան ու օծման կարգ` Հայ Առաքելական եկեղեցւոյ քահանաներու ձեռամբ: Այս մասին կը յայտնեն ԱԳՆ մամլոյ ծառայութենէն:

Ձեռնարկին ներկայ էին 4-րդ եւ 5-րդ շրջաններու ծերակուտական-քաղաքապետ Պրունօ Ժիլը, Մարսէյլի մէջ ՀՀ հիւպատոս Սամուէլ Լալայեանը, փոխքաղաքապետներ, տեղական ինքնակառավարման մարմիններու ներկայացուցիչներ, ֆրանսական եւ հայկական կազմակերպութիւններու նախագահներ, լրագրողներ, հայ համայնքի բազմաթիւ ներկայացուցիչներ:

Մարսէյլի 4-րդ եւ 5-րդ շրջաններու հայ փոխքաղաքապետ Արթուր Օհաննիսեան իր խօսքին մէջ բացատրեց խաչքարի խորհուրդը հայ ժողովուրդի պատմութեան, մշակոյթի եւ հոգեւոր կեանքին մէջ` միաժամանակ նշելով, որ խաչքարը նուիրուած է ոչ միայն Հայոց ցեղասպանութեան զոհերուն, այլեւ արեւելեան քրիստոնեայ այլ փոքրամասնութիւններուն, որոնք սարսափելի փորձութիւններու միջէն  անցած են:

Մարսէյլի 4-րդ եւ 5-րդ շրջաններու ծերակուտական-քաղաքապետ Պրունօ Ժիլ իր խօսքին մէջ նշեց, որ խաչքարի կանգնեցման նպատակը Հայոց ցեղասպանութեան անմեղ զոհերու յիշատակը վառ պահելն ու գալիք սերունդներուն իրազեկելն է 1915-ի հայերու հանդէպ տեղի ունեցած ցեղասպանութեան մասին` յիշատակելով, որ 100 տարի առաջ հայ ժողովուրդին նկատմամբ տեղի  ունեցած է ցեղասպանութիւն պարզապէս այն պատճառով, որ հայ էին եւ քրիստանեայ: Ան նշեց նաեւ, որ որեւէ խաչքարի, յուշարձանի եւ, ընդհանրապէս, պատմութեան էջերը յիշատակող եւ լուսաբանող կառոյցներու առկայութիւնը ապագայ սերունդներուն դաստիարակելու եւ ոգեկոչելու ամենագլխաւոր միջոցներէն մէկն է:

Մարսէյլի մէջ ՀՀ հիւպատոս Սամուէլ Լալայեան իր ելոյթին մէջ շնորհակալութիւն յայտնեց քաղաքապետին խաչքարի տեղադրման առիթով` կարեւոր համարելով վերջինիս հետեւողական գործունէութիւնը Ցեղասպանութեան ժխտման դէմ պայքարին: Այնուհետեւ ան անդրադարձաւ հայ-ֆրանսական բարեկամական յարաբերութիւններուն եւ հայ համայնքի ու տեղական իշխանութիւններու արդիւնաւէտ ու լայնածաւալ աշխատանքներուն` Հայոց ցեղասպանութեան 100-րդ տարելիցին նուիրուած բազմաթիւ ձեռնարներու իրականացման ծիրէն ներս:

Ձեռնարկի  աւարտին «Սահակ Մեսրոպ» երգչախումբի կատարմամբ հնչեցին Ֆրանսայի եւ Հայաստանի պետական օրհներգները, որուն յաջորդեց ծաղկեպսակներու զետեղման արարողութիւնը:

Հալէպի քրիստոնէական թաղամասին մէջ Յունիս 12-­ին տեղի ունեցած է ծառատունկ. տնկուած են 30 ծառեր, որոնցմէ 10-­ը հայ, 10-­ը այլազգի քրիստոնեայ եւ 10-­ը իսլամ նահատակներու անունով: Այս մասին «Արմէնփրես»­ի հետ զրոյցի ընթացքին յայտնած է Բերիոյ թեմի ազգային առաջնորդարանի խօսնակ Ժիրայր Ռէյիսեանը` աւելցնելով, որ ծառատունկին ներկայ եղած են Հալէպի նահանգապետը, տարբեր կուսակցութիւններու եւ հայ համայնքի ներկայացուցիչներ, Սուրիոյ բնապահպանութեան հայազգի նախարար Նազիրա Սարգիսը:

«Մեծ պաստառի վրայ փակցուած են նահատակներուն լուսանկարները եւ 30 թիւը, ծաղիկներ դրուած են նահատակներուն յիշատակին, որմէ ետք տեղի ունեցած է ծառերու տնկման արարողութիւնը»,-­ նշած է Ռէյիսեան` աւելցնելով, որ նախաձեռնութեան ընթացքին ուժեղացած է շրջանի հսկողութիւնը` խուսափելու համար հնարաւոր միջադէպերէ:

Ռէյիսեանի խօսքով, բարեբախտաբար, ձեռնարկը լաւ ընթացած է, առանց միջադէպերու:

Տեղական լրատուամիջոցները լուսաբանած են զայն: Այն հարցումին, թէ ինչո՛ւ որոշուած է 30 ծառ տնկել, որմէ 10-­ը հայ նահատակներուն անունով, Ռէյիսեան տեղեկացուցած, որ թիւին մէջ մասնաւոր իմաստ չկայ, պարզապէս նախապէս որոշուած է տնկել 30 ծառ:

Նախապէս ան տեղեկացուցած էր, որ ծառատունկը տեղի պիտի ունենայ Սուրիոյ բնապահպանութեան նախարարութեան հովանաւորութեամբ: