Փետրուար 2-ին «Հայրենադարձները` տուն դարձածները» շաբաթուան ծիրէն ներս ՀՀ Սփիւռքի նախարարութեան մէջ տեղի ունեցաւ հանդիպում Հայաստան հաստատուած բազմաթիւ հայրենադարձներու հետ:

Ողջունելով ներկաները` ՀՀ Սփիւռքի նախարար Հրանոյշ Յակոբեան նշեց. «Դահլիճում ներկայ են Հայրենիքում հաստատուած մեր հայրենակիցները աշխարհի բազմաթիւ երկրներից: Հայրենիքում ապրելու որոշմամբ դուք աշխարհին ու Հայաստանին ցոյց էք տուել ձեր մարդկային բնութագիրը: Եւ մեր այս հաւաքը գալիս է փաստելու, որ Հայաստան նաեւ վերադառնում են: Դուք եկել էք, որ մասնակից ըլլաք հայրենիքի շէնացման գործին, ձեր ներդրումը ունենալու մեր հայերնիքի զարգացման։ Եկել էք, որպէսի ձեր հողին, ձեր ջրին, ձեր ինքնութեանը, ձեր արմատին աւելի կառչած մնաք։ Մենք մեր երկրում պարտաւոր ենք պահպանել լաւը, իսկ վատը` շտկել` մշտապէս առաջ մղելով «Հայաստա՛նն է իմ տունը» կարգախօսը: Հայաստանում վերջին 4-5 տարիների ընթացքում հաստատուեցին նաեւ 22 հազար սիրիահայեր, եւ ես ուրախ եմ, որ իրենց հետ մեր հայրենակիցները բերեցին ապրելու, ստեղծագործելու նոր մշակոյթ, նոր մօտեցումներ»:

ՀՀ Սփիւռքի նախարարը ընդգծեց, որ քիչ չեն նաեւ այն հայորդիները, որոնք կեանքի բերումով կը գտնուին արտերկիր, բայց իրենց մեծ ներդրումը բերած են եւ կը շարունակեն բերել Հայրենիքի զարգացման գործին: Նախարարը տեսանիւթի միջոցով յիշեցուց յայտնի բարերարներ Քըրք Գրիգորեանը, Էդուարտօ Էռնեկեանը, Սամուէլ Կարապետեանը, Ռուբէն Վարդանեանը, Վաչէ Մանուկեանը, Սեմ Սիմոնեանը, Ճերարտ Գաֆէսճեանը, Վահագն Յովնանեանը, Սերկէյ Համբարձումեանը, Լեւոն Հայրապետեանը, Սերկէյ եւ Նիքոլայ Սարքիսով եղբայրները, Ռուբէն Վարդանեանը ու շատ ուրիշներ, որոնք իրենց կատարած մեծ բարերարութեամբ ու ներդրումներով նպաստած են Հայրենիքի զարգացմամ գործին։

Ներկաները դիտեցին տեսանիւթ, ուր բազմաթիւ հայրենադարձներ ներակայցուցին իրենց հարենադարձման շարժառիթները:

Ապա խօսք առին շատ մը հարենադարձներ՝ անդրադառնալով իրենց Հայաստան հաստատուելու որոշումին եւ հոս ունեցած իրենց կեանքի փոփոխութեան ու որակին մասին։

Իրաքէն վերադարձած երկրաբան-ոսկերիչ Վարանդ Պետրոսեանը նշեց, որ ինք վերադարձած է իր երազած երկիրը եւ շնորհակալութիւն յայտնեց Սփիւռքի նախարարութեան Հայրենիք-Սփիւռք կապերու մերձեցման, հայրենադարձութեան խթանող ծրագիրներ իրականացնելու համար:

Սուրիահայ հայրենադարձ երգիչ, ՀՀ վաստակաւոր արուեստագէտ Արսէն Գրիգորեան առանձնայատուկ հպարտութեամբ շեշտեց, որ այս տարի կը լրանայ Հայաստան հաստատուելուն 30 տարին: «Մենք մեր կամքով չէ, որ ծնած ենք օտար հողի վրայ, բայց մեր կամքով կրնանք հայրենադարձուիլ», – ըսաւ ան:

Իրանէն վերադարձած Տիանա Յովսէփեան իր օրինակով հաւաստիացուց, որ իւրաքանչիւր հայ պէտք է գայ Հայաստան եւ այստեղ որոշէ` ինչ ընել Հայրենիքին համար:

Գործարար Քրիսթիան Կելիճին (Հոլանտա), որ Հայաստանի մէջ աւելի քան 1200 աշխատատեղ ստեղծած է, նշեց. «Ես ուրախ եմ, որ իմ ինը երեխաներս ծնած են այս սուրբ հողին վրայ: Մենք օտարութեան մէջ ապրած ենք Հայրենիքը տեսնելու կարօտով, ուստի իմ զաւակներուն տուած եմ այն, ինչէն ես զրկուած եղած եմ»:

Արաբական Միացեալ Էմիրութիւններէն եկած Լիզա Գարաճեան յայտնեց, որ շատ ուրախ է, որ իր զաւակները այժմ հայրենիքի մէջ կ’ապրին հայկական միջավայրի մէջ են եւ կը շփուին իրենց հայ ընկերներուն հետ։

Գանատայէն հայրենադարձուած, ՀՅԴ Հայ դատի հայաստանեան գրասենեակի տնօրէն Կիրօ Մանոյեան նոյնպէս ընդգծեց, որ Հայաստան ապրիլը զոհողութիւն չէ: «Հայաստանը միակ վայրն է, ուր ես ինծի տէր կը զգամ», – նշեց ան:

Այնուհետեւ ելոյթ ունեցաւ սուրիահայ հայրենադարձ, Սփիւռքի նախարարութեան աշխատակից Նայիրի Մկրտիչեան եւ առաջարկեց ստեղծել հայրենադարձներու խորհուրդ:

Հանդիմումի աւարտին սկիզբ առաւ «Հայաստա՛նն է իմ տունը» շարժումը:

Համերգային կատարումներով հանդէս եկան հայրենադարձ երաժիշտներ Արսէն Գրիգորեան (Մրօ), Գէորգ Հաճեան, ուտահար Ճորճ Վանէսեան, Արարատեան հայրապետական թեմի  «Ծաղկազարդ» համոյթը, Դաւիթ եւ  Շահէ Իսպիրեանները, ասմունքող Լիւսի-Վանա Կարապետեան եւ այլք:

Հայաստանի արտաքին գործոց նախարար Էդուարդ Նալպանտեան Յունուար 31-ին տուած մամլոյ ասուլիսին ընթացքին անդրադարձած է նախարարութեան աշխատանքներուն եւ յայտնած է, որ ղարաբաղեան տագնապին շահարկումը՝ ազրպէյճանական ներքին դրդապատճառներուն համար, վտանգաւոր է եւ անընդունելի:

«Ակնյայտ է, թէ ով հրաժարած է Կազանէն, ով հրաժարած է Սոչիէն, անկէ առաջ՝ Մոսկուայէն, անկէ առաջ՝ Աստրախանէն եւ այլն: Կամ ո՞վ կ’անտեսէ եռանախագահներու 5 յայտարարութիւնները, որոնք կը վերաբերին Լեռնային Ղարաբաղի հարցի կարգաւորման: Ազրպէյճա՛նը: Ասոնք փաստեր են, որոնք ինքնին խօսուն են: Ներքին դրդապատճառներով Ղարաբաղի հիմնախնդրի շահարկումը վտանգաւոր է եւ անընդունելի»,- ըսած է նախարար Նալպանտեան։

Անդրադառնալով այն հարցումին, որ եթէ Ազրպէյճան իր պայմանները չկատարէ, Հայաստան պիտի շարունակէ՞ մասնակցիլ բանակցութիւններուն եւ երկխօսութիւնը տագնապի լուծման գծով՝ նախարար Նալպանտեան պատասխանած է. «Իրենք իրենց սուտերուն մէջ այնքան խճճուած են, որ չեն գիտեր, թէ ինչպէս պէտք է դուրս գան անկէ: Առաջին անգամը չէ, որ Ազրպէյճան կը խոչընդոտէ, կը հրաժարի համաձայնութիւններու կատարումէն, յայտարարութիւններէն, հանդիպումներէն, բայց բանակցութիւններուն այլընտրանք չկայ: Հայաստանը, եռանախագահներուն հետ միասին կը շարունակէ ջանքերը ուղղուած հանգուցալուծման այնպիսի տարբերակի ամրապնդման, որ պիտի ապահովէ Լեռնային Ղարաբաղի ժողովուրդի իրաւունքները, անվտանգութիւնը: Այս է պատճառը, որ ի հարկէ, պէտք է շարունակել բանակցութիւնները»:

Ի՞նչ փուլի մէջ են ապրիլեան իրադարձութիւններէն ետք կողմերուն միջեւ ձեռք բերուած համաձայնութիւնները, զորս ազրպէյճանական կողմը կը մերժէ կեանքի կոչել լրագրողի հարցումին ի պատասխան, նախարարը ըսած է,- «Ազրպէյճանը կ’ընէ այն, ինչ կ’ընէ բազմիցս՝ կը փորձէ խոչընդոտել Հայաստանի եւ եռանախագահներու կողմէն գործադրուող ջանքերուն, որոնք ուղղուած են Լեռնային Ղարաբաղի հակամարտութեան բացառապէս խաղաղ կարգաւորման: Ազրպէյճանը հարցականի տակ դրաւ ձեռք բերուած համաձայնութիւնները, աղաւաղեց զանոնք այն աստիճան, որ եռանախագահները զայն կոչեցին այլասերում: Եռանախագահները ստիպուած են կրկին ու կրկին կրկնել, որ պէտք է անխտիր պահպանուի հրադադարը, անյապաղ իրականացուին ձեռք բերուած համաձայնութիւնները: Այս է գլխաւոր ուղղութիւնը, որմով կ’ուղղորդուին Հայաստանն ու եռանախագահները: Ասոնք միտուած են Լեռնային Ղարաբաղի հիմնախնդրի կարգաւորման գործընթացը առաջ մղելուն»:

Նախարար Նալպանտեան դիտել տուած  է, որ Դեկտեմբեր 2016-ի դրութեամբ Հայաստան դիւանագիտական յարաբերութիւններ հաստատած է 168 պետութեան հետ: Հայաստանի մէջ հաւատարմագրուած են 110 դեսպան, 26 միջազգային կազմակերպութեան ներկայացուցիչ, 1 գլխաւոր եւ 34 պատուաւոր հիւպատոս:

2016-ի Դեկտեմբերի դրութեամբ արտերկրի մէջ Հայաստան ունի հաւատարմագրուած 42 դեսպան եւ գործերու ժամանակաւոր հաւատարմատար, որոնք համատեղութեան կարգով հաւատարմագրուած են ընդհանուր առմամբ 95 երկիրներու մէջ:

Հայաստանի մնայուն ներկայացուցիչներ նշանակուած են 23 միջազգային կազմակերպութիւններու մէջ:

Արտերկրի մէջ կը գործեն Հայաստանի 8 գլխաւոր հիւպատոսութիւն, 1 հիւպատոսական կէտ եւ 36 պատուաւոր հիւպատոս: Հայաստանի Հանրապետութիւնը դիւանագիտական յարաբերութիւններ հաստատած է նաեւ Նիճերիոյ Հանրապետութեան հետ:

Ճափոնի վարչապետ Շինձօ Ապէն Յունուար 30-­ին ընդունած է ՀՀ ԱԺ նախագահ Գալուստ Սահակեանի գլխաւորած խորհրդարանական պաշտօնական պատուիրակութիւնը:

Հանդիպման ընթացքին վարչապետը գոհունակութեամբ փաստած է, որ հայ-­ճափոնական խորհրդարանական փոխգործակցութիւնը վերջին տարիներուն թեւակոխած է զարգացման կարեւոր փուլ, որ իր դրական ազդեցութիւնը ունի երկու երկիրներուն համագործակցութեան վրայ:

ՀՀ ԱԺ հասարակայնութեան եւ տեղեկատուութեան միջոցներու հետ կապերու վարչութեան փոխանցած տեղեկութիւններով՝ ՀՀ ԱԺ նախագահը շնորհակալութիւն յայտնած է ջերմ ընդունելութեան համար եւ յոյս յայտնած, որ հայ-­ճափոնական արդիւնաւէտ համագործակցութիւնը պիտի խորանայ նաեւ միջազգային բազմակողմ հարթակներու վրայ:

Գալուստ Սահակեան Շինձօ Ապէին փոխանցած է ՀՀ Նախագահ Սերժ Սարգսեանի Հայաստան այցի պաշտօնական հրաւէրը:

Ճափոնի վարչապետը իր ջերմ ողջոյնները փոխանցած է ՀՀ Նախագահին եւ նշած, որ երկու երկիրներուն համագործակցութիւնը այժմ կը գտնուի բարձր մակարդակի վրայ: Վարչապետ Շինձօ Ապէն նշած է, որ պատրաստ է Հայաստանի Հանրապետութեան հետ աւելի խորացնել եւ զարգացնել համագործակցութիւնը հնարաւոր բոլոր ոլորտներուն մէջ:

ՀՀ ԱԺ նախագահ Գալուստ Սահակեանն ու Ճափոնի վարչապետ Շինձօ Ապէն քննարկած են նաեւ տնտեսութեան, առեւտուրի, մշակոյթի եւ զբօսաշրջութեան բնագաւառներուն մէջ համագործակցութեան առընչուող հարցեր, ինչպէս նաեւ նախանշած այլ ոլորտներու մէջ համագործակցութեան հնարաւոր ուղիները: